Strákarnir okkar njóta lífsins eftir HM

Leikmenn íslenska landsliðsins hafa nú lokið leik á heimsmeistaramótinu í fótbolta og komu aftur heim til Íslands á miðvikudagskvöld. Ekki stoppuðu allir lengi hér heima, heldur skelltu sér aftur í sólina og flúðu rigninguna hér á Íslandi. 

Strákarnir eru margir hverjir duglegir að deila myndum úr sínu daglega lífi á samfélagsmiðlinum Instagram og í gær deildi Rúrik Gíslason mynd af sér ásamt nokkrum liðsfélögum sínum að snæðingi á veitingastað í Miami í Flórída. Með honum í för eru Alfreð Finnbogason, Aron Einar Gunnarsson, Sverrir Ingi Ingason og Jóhann Berg Guðmundsson.

Gylfi Þór Sigurðsson fór þó ekki með liðsfélögum sínum til Miami, heldur skellti hann sér ásamt kærustu sinni Alexöndru Helgu Ívarsdóttur til Bahamaeyja þar sem þau sleikja sólina og hlaða batteríin eftir HM.