Ríkið sýknað af bótakröfu vegna hópnauðgunarmáls

Héraðsdómur Reykjavíkur sýknaði ríkið af fjögurra milljóna króna bótakröfu manns sem var handtekinn og ákærður vegna hópnauðgunar árið 2014. Maðurinn var talinn hafa sjálfur stuðlað að aðgerðum sem lögreglan greip til gegn honum.

Það var árið 2014 sem fimm piltar voru handteknir og hnepptir í gæsluvarðhald fyrir að hafa nauðgað sextán ára gamalli stúlku í samkvæmi í Breiðholti. Þeir tóku verknaðinn upp á myndband sem fór í dreifingu á netinu. Þeir voru þá á aldrinum 18 til 21 árs gamlir. Ákæra var gefin út á hendur þeim í júní árið 2015.

Mennirnir voru síðar sýknaðir í héraðsdómi og í Hæstarétti.

Taldi sig hafa orðið fyrir mannorðsmissi

Einn þeirra höfðaði mál gegn ríkinu þar sem hann krafðist fjögurra milljóna króna í bætur. Hann byggði meðal annars á því að hann hefði orðið fyrir miklu tilfinningalegu tjóni vegna þeirrar gæsluvarðhaldsvistar og einangrunar sem hann sætti. Tjónið væri fyrst og fremst ófjárhagslegt og fælist í mannorðsmissi, þjáningum og óþægindum vegna rannsóknar og frelsissviptingar, eða með öðrum orðum, miska og hneisu.

Einangrunarvistin hafi verið stefnanda sérstaklega þungbær. Hann hafi haft áhyggjur af ættingjum og ástvinum og átt við andlega vanlíðan og svefnleysi að stríða. Hann hafi verið átján ára gamall þegar hann sætti gæsluvarðhaldinu.

Héraðsdómur hafnaði hins vegar rökum mannsins. Vísaði hann til þess að maðurinn hefði sjálfur stuðlað að aðgerðum lögreglu. Málshöfðun hans nú ætti rót að rekja til ákvarðana sem „stefnandi tók sjálfur þvingunarlaust og á eigin ábyrgð“, þ.e. að eiga ásamt fjórum öðrum mönnum, á sama tíma, kynferðismök við 16 ára stúlku, meðvitaður um að athafnir hans voru teknar upp á myndband.

Þar vísaði dómurinn meðal annars til samskipta mannsins við annan þeirra sem var ákærður í málinu þar sem þeir ræddu um að myndband væri til af samneyti þeirra við stúlkuna. „Ja gaur samt a videoi er þetta sma nauðgun sko,“ skrifaði maðurinn í Facebook-samskiptum þeirra.

Þá hafi maðurinn ekki áfrýjað upphaflegum gæsluvarðhaldsúrskurði. Ekki væri hægt að gera ríkið ábyrgt fyrir því athafnaleysi hans. Því sýknaði Héraðsdómur ríkið af kröfum mannsins á fimmtudag. Málflutningsþóknun lögmanns mannsins, 750.000 krónur, greiðast úr ríkissjóði.