Réttindi launafólks til séreignarsparnaðar aukast verulega

Lífeyrisréttindi launafólks á almennum vinnumarkaði í séreignarsparnaði aukast um 1,5 prósentustig nú um mánaðamótin. Eftir það getur launafólk ráðstafað 3,5 prósentustigum launa sinna í svo kallaða tiltekna séreign sem er til viðbótar við hefðbundinn séreignarsparnað.

Lífeyrissparnaður launafólks er í dag þrenns konar. Í fyrsta lagi hinn hefðbundni lífeyrissparnaður sem tryggir fólki lífeyrisgreiðslur eftir 67 ára aldur, í öðru lagi séreignarlífeyrissparnaður sem er valkvæmur og fólk fær tveggja prósenta mótframlag frá atvinnurekendum við tveggja til fjögurra prósenta framlag launamannsins og í þriðja lagi ný leið sem kölluð hefur verið sértækur séreignarsparnaður.

Um þessa leið var samið í kjarasamningum Alþýðusambandsins og Samtaka atvinnulífsins í byrjun árs 2016. Ákveðið var að hækka mótframlag atvinnurekenda í lífeyrissjóð í þremur skrefum til ársins 2018 um 3,5 prósentustig þannig að heildargreiðsla vegna launafólks á almenna markaðnum yrði sú sama og hjá hinu opinbera.

Skoðum fyrst lífeyrisgreiðslur eins og þær voru árið 2015 áður en þessi nýi sértæki sparnaður kom til sögunnar. Þá greiddi launafólk 4 prósent af launum sínum í lífeyrissjóð og atvinnurekandinn greiddi átta prósent í mótframlag. Heildargreiðsla í lífeyrissjóð samsvaraði því 12 prósentum af launum. 

Fyrsta skref hins sértæka lífeyrissparnaðar var tekið í júlí 2016 þegar mótframlag vinnuveitandans hækkaði í 8,5 prósent og heildargreiðslan í lífeyrissjóð launamannsins fór í 12,5 prósent. Í júlí í fyrra hækkaði mórframlagið síðan um 1,5 prósentustig og hinn fyrsta júlí næst komandi hækkar mótframlagið um einnig um 1,5 prósentustig. 

Þar með hefur mótframlagið hækkað um 3,5 prósentustig, sem launafólk getur ráðstafað að vild í séreignarsparnað. Þessi sparnaður er séreign sem hægt er að leysa út fimm árum fyrir eftirlaunaaldur. 

Það er hins vegar mikilvægt að launafólk tilkynni vinnuveitanda sínum hvernig það vill ráðstafa þessum 3,5 prósentu af launum sínum, því ef fólk hefur ekki frumkvæði að því rennur þessi viðbót í langtíma lífeyrissparnað fólks .