Vilja bætta stjórnsýslu og aukna valddreifingu á Seltjarnarnesi

Viðreisn/Neslistinn, sem býður fram lista til bæjarstjórnar Seltjarnarness hefur gefið út stefnuskrá sína fyrir komandi kjörtímabil.

„Það sem ber hæst í stefnuskránni eru áherslur listans um bætta stjórnsýslu og aukna valddreifingu á Seltjarnarnesi, þar sem sami flokkur hefur verið í hreinum meirihluta frá 1950, eða í 68 ár. Málefni skóla eru fyrirferðarmikil í stefnuskránni.  Þannig vill framboðið hækka laun kennara, byggja leikskóla fyrir 300 börn og setja aukinn metnað í þróun skólastarfs, með það að markmiði að Grunnskóli Seltjarnarness taki faglega forystu á landsvísu,“ segir í fréttatilkynningu frá Karli Pétri Jónssyni, sem leiðir listann.  

„Framboðið leggur ríka áherslu á málefni eldri borgara. Leggur framboðið til að Öldungaráð Seltjarnarnesbæjar fái fulltrúa í öllum nefndum og ráðum bæjarins, á sama hátt og Ungmennaráð. Framboðið vill að auka fagmennsku í þjónustu við eldri borgara og færa félagsstarf þeirra í takt við nýja tíma.

Hvað skipulagsmál varðar, vill framboðið vanda sérstaklega til hönnunar nýs hverfis á svokölluðum Bygggarðareit. Þar verði færustu arkítektum falið að hanna byggð sem er í samræmi við hina miklu náttúrufegurð sem svæðið er þekkt fyrir. Framboðið vill þróa áfram hugmyndir um uppbyggingu miðbæjar Seltjarnarness og finna nýjum leikskóla góðan stað.“

Framboðið vil þar að auki fara í stórátak til að bæta ástand innviða bæjarins, skóla, leikskóla og önnur mannvirki, sem mörg hver liggja undir skemmdum vegna lélegs viðhalds.

„Síðast en ekki síst vill Viðreisn/Neslistinn að fjármál bæjarins verði tekin mun fastari tökum, en bæjarfélagið var rekið með um 100 milljón króna halla á síðasta ári, á sama tíma og fjárfestingarhlutfall bæjarins er lágt í samanburði við önnur sveitarfélög.“

Listi Viðreisnar/Neslista er skipaður eftirfarandi fólki:

1. Karl Pétur Jónsson - Viðskiptafræðingur og varabæjarfulltrúi

2. Hildigunnur Gunnarsdóttir - Menntunarfræðingur og varabæjarfulltrúi

3. Björn Gunnlaugsson - Kennari og verkefnastjóri

4. Rán Ólafsdóttir - Háskólanemi og starfsmaður RSK

5. Oddur Jónas Jónasson - Forstöðumaður þýðinga hjá Stöð 2

6. Margrét H. Gústavsdóttir - Fjölmiðlakona

7. Ragnar Jónsson - Rannsóknarlögreglumaður

8. Ragnhildur Ingólfsdóttir - Arkítekt

9. Garðar Gíslason - Viðskiptafræðingur

10. Dagbjört H. Kristinsdóttir - Hjúkrunarfræðingur

11. Benedikt Bragi Sigurðsson - Sálfræðingur

12. Halldór Jóhannesdóttir Sanko - Sérkennari

13. Páll Árni Jónsson - Framkvæmdastjóri

14. Árni Einarsson - Bæjarfulltrúi