Ríkislögreglustjóri hafnar því að hafa brugðist vegna kærumáls

Ríkislögreglustjóri hafnar því að hafa brugðist dóttur Halldóru Baldursdóttur, eins og Halldóra lýsti í viðtali við Mannlíf fyrir skemmstu.

Þar gagnrýnir Halldóra að lögreglumaður hafi ekki verið leystur undan störfum eftir að hafa verið kærður fyrir brot gegn dóttur Halldóru.

Árið 2011 sagði dóttir Halldóru frá brotinu sem átti sér stað fjórum árum áður. Málið var kært en síðan fellt niður af ríkissaksóknara.

Í viðtalinu gagnrýnir Halldóra að maðurinn sé enn við störf hjá lögreglunni en hún fullyrðir að hann haf verið kærður fyrir brot gegn þremur stúlkum.

Embætti ríkislögreglustjóra hefur sent frá sér andsvör vegna þessa viðtals en þar kemur fram að embættið hafi fyrst frétt af þessu máli í fjölmiðlum árið 2011. Segir embættið að hefð sé fyrir því að því sé tilkynnt um slík mál.

Segist ekki hafa fengið gögn afhent

Óskaði embættið eftir rannsóknargögnum málsins frá ríkissaksóknara til að geta metið hvort leysa ætti lögreglumann frá embættið um stundarsakir eða að fullu en þeirri beiðni var hafnað.

Ítrekaði ríkislögreglustjóri ósk sína um afhendingu allra gagna málsins og benti að synjun ríkissaksóknara væri stefnubreyting frá því sem áður hafði tíðkast um afhendingu gagna í kærumálum á hendur lögreglumönnum.

Ríkislögreglustjóri segir að þar sem beiðni um rannsóknargögn var synjað hafi ekki verið grundvöllur til að byggja á að mati embættisins hvort leysi ætti lögreglumanninn frá embætti og var ríkissaksóknara gerð grein fyrir því.

Bendir embættið á að ríkar kröfur séu gerðar til stjórnvalda um vandaðan undirbúning og meðferð mála embættismanna sem lúta að lausn frá embætti um stundarsakir eða að fullu.

Tilkynnti ráðherra um synjun

Í andsvari embættisins kemur fram að bréf hafi verið sent innanríkisráðuneytinu í nóvember árið 2011 vegna stefnubreytinga ríkissaksóknara. Var innanríkisráðherra kynnt að sökum synjunar ríkissaksóknara væri ríkislögreglustjóra gert ómögulegt að gegna embættisskyldum sínum í þessu máli.

Embætti ríkislögreglustjóra segist hafa vegna alvarleika málsins beint því til þáverandi lögreglustjóra höfuðborgarsvæðisins að meta hvort hann leysti lögreglumanninn undan vinnuskyldu. Segir ríkislögreglustjóri það á forræði lögreglustjóra að ákveða um tilfærslur í starfi og við hvaða verkefni og á hvaða starfsstöð lögreglumaður starfar.

Samkvæmt lögum um réttindi og skyldur starfsmanna ríkisins er greinarmunur á þessum úrræðum og því að leysa embættismann frá embætti. Þá fara lögreglustjórar með stjórn lögregluliðs, hver í sínu umdæmi. Þeir annast daglega stjórn og rekstur lögreglunnar í umdæminu og bera ábyrgð á framkvæmd lögreglustarfa innan þess.

Sem fyrr segir felldi ríkissaksóknari niður mál lögreglumannsins og hafnar ríkislögreglustjóri því að hafa brugðist dóttur Halldóru með þeim hætti sem talað er um í viðtalinu í Mannlífi.