Þóra Kristín nýr upplýsingafulltrúi Kára

Þóra Kristín Ásgeirsdóttir blaðamaður hefur tekið til starfa sem upplýsingafulltrúi Íslenskrar erfðagreiningar. Hún greinir frá þessu á Facebooksíðu sinni.

„Önnur vinnuvikan að hefjast í nýju og spennandi starfi sem upplýsingafulltrúi hjá íslenskri erfðagreiningu.“

Þóra Kristín hefur undanfarna áratugi starfað sem blaðamaður, síðast á Fréttatímanum þar sem hún var fréttastjóri. En, hún hefur einnig starfað á RÚV, Stöð 2, Morgunblaðinu hvar hún hætti þegar Davíð Oddsson var ráðinn sem ritstjóri. Auk þess sem hún ritstýrið vefritinu Smugunni. Þóra Kristín var formaður Blaðamannafélags Íslands í eitt ár, 2009 til 2010, áður en Hjálmar Jónsson tók þar við sem formaður. Straumur blaðamanna hefur legið undanfarin árin úr blaðamennsku í starf upplýsingafulltrúa.

Þóra Kristín mun þá starfa náið með Kára Stefánssyni forstjóra fyrirtækisins en fyrir fáeinum árum gegndi Páll Magnússon þingmaður og fyrrum útvarpsstjóri þeirri stöðu sem Þóra Kristín er í nú.