Framfærslugrunnur LÍN hækkar og flóttafólk öðlast rétt á námslánum

Breytingar á úthlutunarreglum Lánasjóðs íslenskra námsmanna fyrir námsárið 2018-2019 fela í sér að framfærslugrunnur fyrir námsmenn innanlands hækkar og einstaklingar sem njóta alþjóðlegrar verndar eða hafa dvalarleyfi á Íslandi vegna mannúðarsjónarmiða eiga rétt á námslánum.

Lilja Alfreðsdóttir mennta- og menningarmálaráðherra staðfesti endanlegar úthlutunarreglur. „Við styrkjum stöðu allra námsmanna með því að hækka framfærslugrunn LÍN og það eflir íslenskt samfélag að fólk sem dvelst hér hafi tækifæri til að mennta sig,“ segir ráðherra.

Framfærslugrunnur námsmanna innanlands hækkar þá úr 92% af reiknaðri framfærslu þeirra í 96%. Ráðstöfunartekjur námsmanna standa því aðeins undir 4% af reiknaðri framfærsluþörf þeirra á námstímanum í staðin fyrir 8% áður.

Einstaklingar sem hafa fengið alþjóðlega vernd á Íslandi eða hafa dvalarleyfi á grundvelli mannúðarsjónarmiða eiga nú einnig rétt á námslánum hjá LÍN ef þeir eru komnir til landsins og staðfesting frá Útlendingastofnun liggi fyrir.