Sjúkdómsgreiningin var lán í óláni

„Mig dreymir um að fara í grunnskóla landsins með fyrirlestra um átröskun til að ná eyrum unglinga sem eru á afar viðkvæmum og móttækilegum aldri fyrir fölskum glansmyndum samfélagsmiðla. Skilaboðin voru víst nógu slæm þegar ég var unglingur en hvað þá núna þegar fótó­ sjoppaðar píur birtast hvarvetna á samfélagsmiðlum og gefa stúlkum kolranga og villandi mynd af því hvernig konur eiga að líta út,“ segir Lína Birgitta Camilla Sigurðardóttir, áhrifavaldur, einkaþjálfari og fatahönnuður.

Lína veit hvað hún syngur. Hún barðist við lotugræðgi frá tólf ára aldri þar til hún varð 25 ára. „Ég var bolla sem barn og lifði á brauði, sætindinum og gosi. Á þrettánda árinu fannst mér ég vera orðin of feit og þótti sniðug hugmynd að kasta upp mat,“ segir Lína um upphaf tólf ára átröskunartímabils í lífi sínu.

„Nú eru komin tvö ár síðan ég fór í meðferð við átröskun hjá Hvíta bandinu innan geðdeildar Landspítalans. Þar starfar frábært teymi og ótrúlegt hvernig meðferðin gagnaðist mér. Ég sem hélt að ég myndi aldrei hætta að belgja mig út af mat og kasta honum upp.“ Hún segir æ fleiri meðvitaða um neikvæð áhrif samfélagsmiðla á sjálfsmynd ungs fólks.

„Þess vegna taka margir áhrifavaldar myndir af sér standandi við spegil á sömu mínútunni þar sem þeir spenna magann á fyrri myndinni og eru svo slakir á þeirri seinni en á þeim virðist þá tíu kílóa munur. Það er til að sýna að á Instagram eru allir upp á sitt besta og flestallt glansmynd, og á því þarf að vekja athygli.“

Sjúkdómur breytti lífinu

 Lína stóð á tvítugu þegar hún greindist með Chrons-sjúkdóminn en það er langvinnur bólgusjúkdómur í meltingarfærum.

„Að greinast með sjúkdóminn var lán í óláni,“ segir Lína. „Ég hafði lengi tamið mér óhollt mataræði og var mikið á djamminu. Því var sjúkdómsgreiningin ábending um að taka til í eigin ranni og velja og hafna mér til heilsubótar.“ 

Samkvæmt læknisráði þurfti Lína að læra að lifa upp á nýtt. „Ég tók það mjög alvarlega. Það var annaðhvort að halda áfram að borða hvað sem var og vera alltaf að drepast eða losa mig alfarið við það sem mér varð illt af. Ég fór því að hlusta betur á líkamann og hætti að borða allt sem fór illa í mig, tók út mjólkurafurðir og kjöt, og hef verið grænmetisæta síðan.“

Orkuleysi var fylgifiskur sjúkdómsins og fór Lína í líkamsrækt til að byggja upp þrekið.

„Hægt og bítandi jókst mér þrek og smám saman fór ég að hafa yndi af líkamsrækt. Batinn leyndi sér ekki með breyttu mataræði og aukinni hreyfingu, og með réttum lyfjum við sjúkdómnum varð kraftaverk í mínu lífi.“

„Í dag líður mér vel og ég kann betur á sjálfa mig til að halda sjúkdómseinkennum niðri. Ég þarf að hlusta þegar líkaminn verður þreyttur og vera þá minna á útopnu en þetta er ævilangt ástand og þarf ég í lyfjagjöf á spítalann á sex vikna fresti,“ útskýrir Lína.

Úr Óla Prik í tískuhönnun

Smituð af líkamsræktarbakteríunni ákvað Lína að læra til einkaþjálfara og réð sig til Reebok Fitness eftir útskrift.

„Við þjálfun og æfingar var ég alltaf í íþróttagallanum en fannst vanta framboð af litríkari íþróttafötum og með djarfari mynstrum. Mig hafði lengi dreymt um að hanna eigin fatalínu, fékk þá flugu í kollinn að hanna íþróttafatnað og lét slag standa. Ég sé ekki eftir því, er mjög ánægð með útkomuna og við­ tökurnar hafa verið framar björtustu vonum,“ segir Lína.

Íþróttafatalína Línu kallast Define the Line Sport. „Ég er vonlaus teiknari og mitt helsta afrek á teiknisviðinu er Óli Prik en ég læt það ekki stoppa mig. Ég teikna flíkurnar eins og þær standa mér fyrir hugskotssjónum og læt svo fullvinna fötin ytra, vel sjálf efnin og fæ send sýnishorn sem ég læt breyta og bæta þar til þau eru nákvæmlega eins og ég sá þau fyrir mér. Allt er það ofboðslega skemmtilegt ferli og á vel við mig,“ segir Lína sem stofnaði tískuverslun með sama nafni þegar hún var tvítug en selur íþróttafatnaðinn eingöngu í vefverslun sinni.

„Ég hitti á góðan tíma að koma fram með þennan fatnað því nú er hæstmóðins að vera í íþróttafatnaði í dagsins önn og ekki bara í líkamsræktarsalnum. Það er næstum eins og að vera í engu að klæðast þeim, svo létt og þægileg eru þau,“ útskýrir Lína

Veikleikinn er súkkulaði

Define the Line vísar í nafn Línu, sem fagnar eins árs afmæli íþróttalínunnar í apríl. Út koma þrjár vörulínur á ári og er næsta væntanleg í maí.

„Markmiðið er að fara meira inn á erlendan markað enda er mikil eftirspurn eftir vörumerkinu þar. Ég vinn mikið innan samfélagsmiðla og fæ erlendar Instagram- og Snapchatstjörnur til að sýna vörurnar á sínum síðum. Innan þess geira vinna allir saman og þegar breskur áhrifavaldur klæddist merkinu mínu um daginn hrúguðust inn pantanir frá Bretlandi. Áhrifavaldarnir hér hafa greiðan aðgang að áhrifavöldum ytra og meirihluti þeirra er opinn fyrir því. Það er því varla til betri tími til að stofna fyrirtæki en nú og mér finnst að sem flestir ættu að nýta sér það.“

En þótt Línu sé umhugað um heilsuna ætlar hún að njóta páskanna.

„Fram undan er mikil súkkulaðiveisla og ég hlakka mikið til. Ég æfi mikið og helst fimm sinnum í viku. Þá líður mér vel og borða með fram hollt, en súkkulaði er veikleiki minn og ég læt það eftir mér þótt allt sé gott í hófi.“

Hægt er að skoða íþróttafatnað Línu á definethelinesport.com og fylgjast með henni á Snapchat undir linethefine og á Instagram undir linabirgittasig / definethelinesport.