Svona úrslitaleikir henta ÍBV og Fram

Undanúrslit Coca-Cola-bikarsins í karlaflokki fara fram í Laugardalshöll í kvöld með leikjum Hauka og ÍBV annars vegar og Selfoss og Fram hins vegar. Bikarhefðin er rík hjá Haukum og ÍBV en í hinu einvíginu hefur Fram ekki unnið í átján ár og Selfoss aldrei unnið bikarinn.

Áberandi sterkari lið

Fréttablaðið fékk Kára Garðarsson, þjálfara Gróttu, til að spá í spilin fyrir leiki kvöldsins. Hann á von á því að sigurvegari helgarinnar komi úr einvígi ÍBV og Hauka.

„Rétt eins og kvennamegin finnst mér annað einvígið áberandi sterkara og fyrir fram myndi maður telja að sigurvegari þessa leiks sé ansi líklegur til að klára helgina með titli,“ sagði Kári sem hefur hrifist af Haukum eftir áramót.

„Haukar eru búnir að endurheimta sína menn og líta mjög vel út. Að mínu mati eru þeir að spila liða best eftir áramót,“ sagði Kári sem sagði stemminguna lykilatriði fyrir ÍBV.

„ÍBV er óútreiknanlegra lið fyrir leik á meðan Haukarnir eru stöðugri og bikarkeppnir henta Eyjamönnum mjög vel. Þeir fá oft flottan stuðning í svona leikjum og ná góðri stemningu í leikmannahópinn.“

Í leiknum mætast landsliðsmarkverðirnir Aron Rafn Eðvarðsson, ÍBV, og Björgvin Páll Gústavsson, Haukum. Kári sagði það geta skipt sköpum fyrir úrslit leiksins ef annar hvor þeirra hrykki í gír og næði að loka markinu. „Þetta er einvígi þeirra, markvarslan og varnarleikur á eftir að vera það sem vinnur leikinn fyrir sigurliðið.“

Þessir leikir henta Fram

Í seinni leiknum mætast Fram og Selfoss en nýliðar Selfoss unnu báða leiki liðanna í Olís-deildinni og eru að berjast við topp deildarinnar. Framarar eru fastir í neðri hluta deildarinnar, fara hvorki neðar né ofar.

„Sagan hjá Fram segir manni að félagið þekki þetta betur og þeir eru með lið sem þrífst á svona stórleikjum. Þeir vinna stóru leikina oft, slógu út Aftureldingu og FH í bikarnum í ár. Þeir eiga alltaf frábæra leiki inn á milli og það gæti hjálpað þeim að horfa á þetta sem úrslitaleik og að pressan sé á Selfossi,“ en Kári á von á einhverju óvæntu frá Fram.

„Guðmundur, þjálfari Fram, er tilbúinn að taka áhættu og taka menn úr umferð og hann á örugglega eftir að láta reyna á Patrek og Selfyssinga á morgun. Svo getur Viktor Gísli í markinu hjá Fram tekið yfir leiki og lokað markinu.“

Pressa á Selfyssingum

Þrátt fyrir að vera nýliði í deildinni er meiri pressa á Selfyssingum að komast í bikarúrslitin.

„Öll pressan er á þeim, það er ætlast til að þeir nái árangri og þeir hafa verið að spila frábæran handbolta. Patrekur er að gera frábæra hluti með liðið þó að þeir hafi eiginlega verið heppnir að komast áfram gegn Þrótti í síðustu umferð bikarsins,“ sagði Kári og bætti við:

„Þeir ná upp góðri stemmingu í liðinu og í stúkunni og það smitar inn á völlinn. Ef þú tekur liðin tvö og berð saman, mann fyrir mann, þá er Selfoss með betra liðið að mínu mati.“

Taldi hann lykilatriði fyrir Fram að loka á skyttur Selfyssinga.

„Selfyssingar sakna auðvitað Hauks í leiknum en lykillinn fyrir Fram að sigri er að loka á þessar frábæru skyttur sem Selfoss er með,“ sagði Kári. Leikirnir hefjast klukkan 17.15 og 19.30 og fara fram í Laugardalshöll.