„Mikilvægt skref“ fyrir Hafnfirðinga að losna loks við raflínurnar segir bæjarstjóri

Flutningur tveggja háspennulína mun marka tímamót og er mikill áfangi fyrir Hafnfirðinga að sögn bæjarstjóra. Fyrirhuguð framkvæmd við flutning raflínanna hefur verið kærð til Úrskurðarnefndar umhverfis- og auðlindamála en bæjarstjóri segir það alvarlegt mál ef ekki verður af framkvæmdinni.

Bygging nýrrar háspennulínu frá Hamranesi um Sandskeið er forsenda þess að hægt verði að fjarlægja Hamraneslínur og flytja svokallaðar Ísallínur fjær byggð í Vallahverfi í Hafnarfirði. Til stendur að þar sem raflínurnar liggja nú verði reist íbúðabyggð fyrir um 2-3 þúsund manns. Flutningur línanna hefur staðið til í á annan áratug að sögn Haralds L. Haraldssonar, bæjarstjóra í Hafnarfirði, sem fagnar því að Landsnet hafi loks um helgina auglýst útboð í verkið. Íbúar í Hafnarfirði hafa lengi þrýst á að línurnar verði fjarlægðar.

„Þeim var lofað því, þeir íbúar sem búa næst línunum hérna á Völlunum, þeim var lofað því að þessar línur væru farnar í dag þannig að þetta eru alveg stórt mál hjá okkur tímamót að núna skuli verið að bjóða út þetta verk,“ segir Haraldur í samtali við Stöð 2.

„Alvarlegt mál“ ef úrskurðurinn setur strik í reikninginn

Samkvæmt samningi við Landsnet ættu línurnar að víkja þegar á þessu ári að sögn Haraldar. „En það er ljóst miðað við það að framkvæmdir eru ekki byrjaðar en eru vonandi að fara af stað núna, þannig að við sjáum að þær ættu þá að vera farnar á næsta ári.“

Þótt Hafnfirðingar fagni áformunum hefur framkvæmdin þó verið nokkuð umdeild. Sveitarfélögin á höfuðborgarsvæðinu hafa gefið út framkvæmdaleyfi fyrir línulögnunum en Náttúruverndarsamtök hafa kært áformin til úrskurðarnefndar umhverfis- og auðlindamála, meðal annars vegna þess að nýjar línur koma til með að liggja nærri vatnsverndarsvæði. Úrskurðar er að vænta í næsta mánuði.

„Ég treysti því að þetta verk sé vel undirbúið og þau gögn sem að ég hef séð og við höfum farið yfir, að þá teljum við að þetta eigi alveg að standast þann úrskurð. En það væri mjög alvarlegt mál ef það gerði það ekki,“ segir Haraldur.