Ákærður fyrir nauðgun og kynferðisbrot gegn barni

Héraðssaksóknari hefur ákært karlmann fyrir nauðgun og kynferðisbrot gegn barni. Málið var þingfest í Héraðsdómi Reykjavíkur í dag.

Er manninum gefið að sök að hafa að kvöldi í ágúst 2016 sótt stúlku að söluturni, ekið með hana á afvikinn stað í Heiðmörk og hafa þar í aftursæti bílsins kysst hana og látið hana hafa við sig munnmök.

Í ákæru héraðssaksóknara segir að ákærði hafi nýtt sér yfirburðarstöðu sína gagnvart stúlkunni vegna aldurs- og þroskamunar og þess að hún var stödd ein með honum fjarri öðrum.

Auk þess hafi hann tekið um höfuð hennar og ýtt henni að lim sínum þegar hún reyndi að hætta munnmökunum.

Stúlkan er ófjárráða og krefst faðir hennar 3,5 milljóna króna miskabóta fyrir hönd dóttur sinnar.