Banaslysið í Jökulsárlóni: Skipstjórinn dæmdur í tveggja mánaða fangelsi

Karlmaður á þrítugsaldri hefur verið dæmdur í tveggja mánaða skilorðsbundið fangelsi. Hann var ákærður af  Lögreglustjóranum á Suðurlandi fyrir manndráp af gáleysi. Maðurinn var skipstjóri á hjólabátnum Jaka sem bakkað var yfir kanadíska konu við Jökulsárlón sumarið 2015 með þeim afleiðingum að konan lést.

Skipstjórinn var sviptur réttindum sínum í hálft ár og dæmdur til að greiða málskostnað upp á um tvær milljónir króna. Dómurinn hefur ekki verið birtur enn sem komið er á vefsíðu dómstólanna en hann var kveðinn upp síðdegis í Héraðsdómi Reykjavíkur. Skiptstjórinn var ekki viðstaddur dómsuppkvaðninguna.

Í ákærunni var skipstjórinn sakaður um að hafa ekki sýnt nægjanlega aðgæslu þannig að báturinn hafnaði á konunni með þeim afleiðingum að hún hlaut fjöláverka og lést nær samstundis. Málið var tvö ár í rannsókn hjá lögreglu áður en ákæra var gefin út sumarið 2015. Hálfu ári síðar hefur verið kveðinn upp dómur.

Þegar slysið átti sér stað fylgdist fjölskyldan með þyrlu lenda á malarsvæði fyrir aftan bátinn. Það var þá sem skipstjórinn bakkaði, án þess að líta aftur fyrir sig.

Treysti alfarið á aðstoðarmann

Í skýrslu Rannsóknarnefndar samgönguslysa kom fram að skipstjórinn hefði verið réttindalaus og alfarið treyst á aðstoðarmann sem gaf honum merki um að í lagi væri að bakka. Þar kemur einnig fram að fólkið hefði ekki heyrt í bátnum þar sem hávaðinn frá þyrlunni yfirgnæfði hljóðið.

Aðalmeðferð í málinu fór fram í Héraðsdómi Austurlands á Egilsstöðum í nóvember. Þar bar meðal annars vitni eiginmaður konunnar sem lést.

Hann lýsti því hvernig hann hefði rétt náð að forða sjálfum sér. Hann hefði legið á bakinu og náð að snúa sér þannig að farartækið ók rétt fram hjá nefinu á honum. 

„Konan mín lá á maganum og beint fyrir aftan dekkið sem fór svo yfir hana. Síðustu orðin hennar voru „Hvað er að gerast? Guð minn góður,“ og svo fór dekkið yfir hana og hún dó samstundis.“ 

Sagði konuna hafa sýnt vítavert gáleysi

Í greinargerð verjanda skipstjórans, sem lögð var fyrir dóminn, var því haldið fram að konan hefði ekki orðið undir bátnum vegna aðgæsluleysis mannsins heldur benti flest til þess að það væri vegna vítaverðs gáleysis konunnar.

Með því að vera á bátaplaninu í akstursleið bátanna, stöðva þar og einblína á þyrlu án þess að gæta að því að hún væri stödd á svæði þar sem akstur hjólabáta færi fram.

Þá kom fram að bakkmyndavél á bátnum var biluð sem skipstjórinn sagði til marks um andvaraleysi sem ríkt hafi í öryggismálum. Auk þess væri ekki rétt sem fram hefði komið í skýrslu rannsóknarnefndarinnar varðandi réttindi hans því hann hefði réttindi til að stjórna skipum allt að tólf metra á lengd. Hjólabáturinn var 10,6 metrar að lengd.

Þyngsta mögulega refsing fyrir manndráp af gáleysi er sex ára fangelsi.