Sóley aðstoðar Ásmund Einar

Sóley Ragnarsdóttir lögfræðingur hefur verið ráðin aðstoðarmaður Ásmundar Einars Daðasonar félags- og jafnréttismálaráðherra.

Í tilkynningu frá velferðarráðuneytinu kemur fram að Sóley hafi útskrifast með meistarapróf í lögfræði frá Háskólanum í Reykjavík árið 2008 og lokið réttindum til að starfa sem héraðsdómslögmaður vorið 2012.

„Undanfarin sjö ár hefur Sóley starfað sem lögfræðingur hjá Samkeppniseftirlitinu. Áður vann hún um tveggja ára skeið hjá Útlendingastofnun. Síðastliðin tvö ár var Sóley varamaður í úrskurðarnefnd velferðarmála. Einnig hefur hún tekið þátt í nefndastörfum á vegum Kópavogsbæjar frá árinu 2016.

Sóley á sæti í stjórn Framsóknarfélags Kópavogs, situr í fulltrúaráði Framsóknar í Kópavogi og er varamaður í stjórn þess ráðs,“ segir í tilkynningunni.