Andri Rúnar fer með íslenska landsliðinu til Indónesíu

Andri Rúnar Bjarnason, markakóngur Pepsi-deildar karla 2017 og markametshafi, spilar væntanlega sinn fyrsta A-landsleik í Indónesíu seinna í þessum mánuði.

Andri Rúnar segir í viðtali við heimasíðu sænska liðsins Helsingborg að hann sé á leiðinni með íslenska landsliðinu til Indónesíu frá 6. til 16. janúar næstkomandi.

Vi säger grattis till Andri Runar Bjarnason som blivit uttagen till det isländska landslaget!

Intervju och mer info  https://t.co/RY5AjLfzSUpic.twitter.com/jE17YG3I3a

— Helsingborgs IF (@HelsingborgsIF) January 3, 2018

Heimir Hallgrímsson, landsliðsþjálfari, valdi 22 manna hóp um miðjan desember en hefur þurft að gera nokkrar breytingar á honum vegna forfalla leikmanna.

Albert Guðmundsson, Orri Sigurður Ómarsson og Ólafur Ingi Skúlason höfðu allir komið inn í upprunalega hópinn og nú bætist Andri Rúnar við.

„Ég er mjög spenntur enda hefur þetta verið draumur minn frá því að ég var lítill strákur,“ sagði Andri Rúnar Bjarnason í viðtalinu á heimasíðu Helsingborg sem sjá má hér fyrir neðan.

Andri Rúnar Bjarnason skoraði 19 mörk í 22 leikjum í Pepsi-deild karla síðasta sumar og jafnaði þar með markamet þeirra Péturs Péturssonar, Guðmundar Torfasonar, Þórðar Guðjónssonar og Tryggva Guðmundssonar.