Aron líklega klár í fyrsta leik

Aron Pálmarsson tók fullan þátt í æfingu íslenska landsliðsins í handbolta í kvöld og leit vel út. Þetta staðfesti Óskar Bjarni Óskarsson, aðstoðarlandsliðsþjálfari, við RÚV í kvöld.

Aron hefur verið að glíma við meiðsli í baki og var tvísýnt með þáttöku hans á Evrópumótinu í Króatíu sem hefst í lok vikunar. Aron tók ekki þátt í æfingu landsliðsins í morgun en hann kláraði heila æfingu í kvöld.

Landsliðið er sem stendur í Þýskalandi en ferðast á morgun til Split í Króatíu þar sem riðill Íslands verður leikinn.

Staðan á Aroni verður tekin þegar komið er til Króatíu en eins og staðan er í kvöld er gert ráð fyrir því að hann verði klár í fyrsta leik gegn Svíum á föstudaginn.