Telja sig ekki hafa vald til að skipta sér af sjálfum á kjörstað

Landskjörstjórn telur sig ekki geta skipt sér af sjálfumyndatökum við kjörstaði. Þetta kemur fram í svari landskjörstjórnar við mótmælabréfi Vökunnar við athugasemdum yfirkjörstjórnar í Reykjavík norður. Þá hvetur Vakan ungt fólk til að taka sjálfsmyndir fyrir utan kjörstaði, sem þó eru ekki skylda til að komast inn á tónleikana.

Vakan sendi mótmælabréf til landskjörstjórnar í kjölfar athugasemda frá yfirkjörstjórn í Reykjavík norður. Yfirkjörstjórnin gerði athugasemdir við að ungu fólki yrði boðið á tónleika, kosningavöku Vökunnar í Valsheimilinu næstkomandi laugardag, gegn því að taka af sér sjálfur á kjörstað.

Í tilkynningu frá Vökunni segir að landskjörstjórn telji „álitaefni um sjálfumyndatökur sem miða á tónleika ekki falla undir valdmörk sín samkvæmt lögum um kosningar til Alþingis.“

Ekki gert ráð fyrir því að landskjörstjórn fari með yfirstjórn

Í svarbréfi landskjörstjórnar segir að viðfangsefni landskjörstjórnar séu afmörkuð og að ekki sé gert ráð fyrir að hún fari með almenna yfirstjórn kosningalaga.

„Samkvæmt lögum um kosningar til Alþingis eru viðfangsefni landskjörstjórnar afmörkuð við nánar tilgreind atriði er lúta að því að ákveða mörk kjördæmanna í Reykjavík, fjalla um ágreining sem kann að rísa um gildi framboðslista, auglýsa framboðslista og hvaða stjórnmálasamtök bjóði fram lista við alþingiskosningar og að reikna út niðurstöður alþingiskosninga. Lög um kosningar til Alþingis gera ekki ráð fyrir því að landskjörstjórn fari með almenna yfirstjórn laganna eða hafi að öðru leyti það hlutverk að láta í té almenna túlkun á framkvæmd þeirra, þ.m.t. á stjórnsýslu yfirkjörstjórna.“

Sjá einnig: Tvískinnungur að það megi aka fólki á kjörstað en ekki taka myndir fyrir tónleika

Landskjörstjórn bendir þó á að hlutverk yfirkjörstjórna sé að gæta þess að kosningaáróður fari ekki fram á eða í kringum kjörstað.

„Í tilefni af þeim upplýsingum sem fram koma í tölvupósti formanns yfirkjörstjórnar Reykjavíkurkjördæmis norður telur landkjörstjórn engu að síður rétt að benda á að yfirkjörstjórnir hafa m.a. það hlutverk að sjá til þess að á kjörstað og í næsta nágrenni hans fari hvorki fram „óleyfilegur kosningaáróður eða kosningaspjöll“ né önnur starfsemi sem truflar eða hindrar framkvæmd kosninga,“ segir í svarbréfinu.

Fyrr í mánuðinum samþykkti borgarráð að veita Vökunni styrk að upphæð 2.000.000 króna en tónleikarnir áttu að stuðla að aukinni kosningaþátttöku ungs fólks. Meðal þeirra sem koma fram á tónleikunum eru Aron Can, Reykjavíkurdætur, Sturla Atlas, Birnir og Páll Óskar.

Frítt er inn á tónleikana sem fara fram í Valsheimilinu á laugardagskvöld. Allar nánar upplýsingar má nálgast á vefsíðu Vökunnar.

Uppfært: Fyrirsögn fréttarinnar hefur verið breytt og gerð skýrari.