Tilfinningarnar báru Ingu Sæland ofurliði í leiðtogaumræðunum

„Mín framtíðarsýn er einfaldlega sú að við getum öll gengið hér um fallega landið okkar og borið höfuðið hátt og verið stolt af því að vera Íslendingar,“ sagði Inga Sæland formaður Flokks fólksins í leiðtogaumræðunum í beinni útsendingu á RÚV. Inga varð svo klökk og þurfti að gera hlé á máli sínu en hélt svo áfram:

„Mín framtíðarsýn er sú að öryrkjum líði ekki eins og annars flokks þjóðfélagsþegnum í þjóðfélaginu okkar. Að gamla fólkið okkar geti lifað hér með reisn og eigi áhyggjulaust ævikvöld. Að 9,1 prósent barnanna okkar líði ekki hér mismikinn skort, að 25 prósent barnanna okkar búi ekki við óviðunandi húsnæðiskost.“

Ljóst var að Inga hefur miklar áhyggjur af ástandinu eins og það er núna og átti erfitt með að ljúka því sem hún vildi segja. Sem hluta af framtíðarsýn sinni nefndi hún einnig:

„Að enginn Íslendingur ætti að þurfa að búa í tjaldi eða í hjólhýsi niðri í Laugardal eða nokkurs staðar annars staðar. Það er á morgun sem að þessi rödd er tilbúin að tala okkar máli, þetta er tækifærið sem við höfum til þess að fá uppreisn í þessu samfélagi.“