Guðni bað fólk um að hafa varann á

Guðni Th. Jóhannesson, forseti Íslands, setti aldarafmæli Viðskiptaráðs Íslands í Háskólabíói rétt í þessu. Áður en hann setti viðburðinn lagði hann fram óskaráð sitt þess efnis að viðskiptalífið myndi afla með réttu, gæta með visku og veita með mildi.

Í ávarpi sínu minntist Guðni á að fyrir áratug virtist ósköp bjart yfir íslensku viðskiptalífi. En dramb væri falli næst, því ári síðar skall á með bankahruni og varð árið 2007 að táknmynd sinnuleysis og gorgeirs.

Guðni sagði íslenskt viðskiptalíf eiga að draga lærdóm af þessari reynslu og að stefna ætti saman að enn betra samfélagi þar sem hlúð er að þeim sem eiga á brattan að sækja, samfélagi þar sem menntun, heilbrigði, jafnræði sé að leiðarljósi sem og friður, réttlæti og fegurð.

Guðni minntist rithöfundarins Sigurðar Pálssonar og las upp ljóð úr bókinni Ljóð muna rödd:

Hvað sem hver segir

byggir friður á réttlæti

Hvað sem hver segir

er fegurðin ekki skraut

heldur kjarni lífsins

Já gefðu mér rödd

gefðu mér spámannsrödd

til að bera fegurðinni vitni

Gefðu mér rödd

til að bera réttlætinu vitni

Guðni sagði þetta ljóð vera boðskap um fagra framtíð, hin raunverulegu gildi lífsins. „Megi fagrar framtíðar vonir rætast,“ sagði Guðni en hann rifjaði einnig upp nýlega ræðu Sigurðar sem sagði aðgang að fortíðinni eiga að vera stökkpall inn í framtíðina. Sá sem hefur lifandi aðgang að fortíðinni sé betur til þess fallinn að ráða við framtíðina.

„Frá mínum bæjardyrum séð eru þetta djúp sannindi,“ sagði sagnfræðingurinn Guðni.

Að neðan má sjá upptöku frá fundinum sem var í beinni útsendingu á Vísi.