Halldór Auðar Svansson hættir í borgarstjórn

Halldór Auðar Svansson, eini borgarfulltrúi Pírata í borgarstjórn, hefur ákveðið að gefa ekki kost á sér til áframhaldandi setu í borgarstjórn eftir kjörtímabilið. Halldór tilkynnti um ákvörðun sína á aðalfundi Pírata í Reykjavík í dag og birti auk þess færslu henni til útskýringar á Facebook-síðu sinni.

„Á aðalfundi Pírata í Reykjavík tilkynnti ég nú rétt í þessu um erfiða ákvörðun sem hefur verið lengi í fæðingu. Hún hefur - líkt og allar ákvarðanir - sína kosti og galla en ég tel að hún sé hreinlega sú rétta. Ákvörðunin er sú að gefa ekki kost á mér til áframhaldandi setu í borgarstjórn að núverandi kjörtímabili liðnu,“ skrifar Halldór í færslu sem hann birti á Facebook-síðu sinni í dag.

Ætlaði að vera í mesta lagi tvö kjörtímabil

Þá tekur Halldór sérstaklega fram að hann hyggist ekki hætta vinnu við grasrótarstarf Pírata.

„Ég fór alltaf inn í þessa vinnu með það fyrir augum að vera í mesta lagi tvö kjörtímabil og meta eftir því sem á liði hvort ég treysti mér í tvö eða bara eitt. Ég tek hér strax fram að ég kem að sjálfsögðu til með að taka áfram virkan þátt í grasrótarstarfi Pírata. Ég er ekki að fara neitt nema úr borgarstjórn en það geri ég ekki fyrr en kjörtímabilinu lýkur,“ skrifar Halldór sem segist tilkynna um þessa ákvörðun sína á þessum tímapunkti í nafni heiðarleika og gagnsæis.

Halldór rekur einnig áherslur Pírata í borgarstjórn Reykjavíkur og þau verkefni sem hann hefur sjálfur unnið að í sæti sínu sem borgarfulltrúi. Þar á meðal nefnir hann rafræna þjónustumiðstöð sem nýtir nútímatækni til að bæta þjónustuferla borgarinnar og opnun á bókhaldi borgarinnar.

Á enn verk fyrir höndum í borgarstjórn

Þá segir hann ekki nauðsynlegt að hann fylgi sjálfur vinnunni eftir heldur sé aðalmálið að Píratar komi sér upp góðri stefnu fyrir Reykjavík og sveitarstjórnarstigið almennt. Að því sögðu er kjörtímabilinu þó enn ekki lokið og á Halldór enn verk fyrir höndum.

„Eins og áður segir er ég auðvitað ekki alveg farinn. Síðasta stærsta verkefni mitt verður að tryggja að kláruð verði almenn lýðræðisstefna fyrir borgina,“ skrifar Halldór.

„Ég held sem fyrr segir að gildi formlegrar stefnumótunar sem tæki til að innleiða breytingar verði síst vanmetið. Þegar þessi verkefni eru komin í gegn get ég gengið sáttur frá borði og mun bjóða nýja félaga velkomna í stýrishúsið í vor, sem verða samkvæmt hefðum og reglum Pírata valdir af félagsmönnum í prófkjöri.“

Færslu Halldórs má lesa í heild sinni hér að neðan.