Lögregla tók grjót og eggvopn af úkraínskum stuðningsmönnum

Tveir af stuðningsmönnum úkraínska karlalandsliðsins í knattspyrnu voru handteknir fyrir utan Laugardalsvöll í kvöld en þeir reyndu að koma sér miðalausir á leik Íslands gegn Úkraínu í undankeppni heimsmeistaramótsins í knattspyrnu.

Níu hundruð stuðningsmenn fylgdu úkraínska landsliðinu til Íslands og var lögreglan á höfuðborgarsvæðinu með talsverðan viðbúnað vegna þeirra og naut meðal annars aðstoðar sérsveitar ríkislögreglustjóra við gæslu á Laugardalsvelli.

Ásgeir Þór Ásgeirsson, yfirlögregluþjónn á höfuðborgarsvæðinu, segir lögreglu hafa lagt hald á talsvert af grjóti sem einhverjir af úkraínsku stuðningsmönnunum reyndu að smygla inn á völlinn. Einnig var lagt hald á eitt eggvopn sem úkraínskur stuðningsmaður reyndi að smygla inn á völlinn og þá voru sömuleiðis allar flöskur teknar af þeim.

Ásgeir segir að lögregluna hafa tekið aðgangsmiða af þeim sem reyndu að smygla slíku inn á völlinn og var þeim í kjölfarið meinuð innganga.

Hann vissi ekki til þess að lagt hafi verið hald á einhver blys, en eins og þeir sáu sem fylgdust með útsendingu frá leiknum kveikti einn af úkraínsku stuðningsmönnunum í blysi í stúkunni.

Úkraínska liðið hefur leikið alla heimaleiki sína í undankeppninni fyrir luktum dyrum og því eru útileikir liðsins eini möguleiki stuðningsmanna til að sjá liðið sitt spila.

Ásgeir Þór sagði við Fréttablaðið í morgun að lögreglan hefði haft upplýsingar frá lögreglu í Króatíu og Finnlandi um vandræði sem fylgdu úkraínsku stuðningsmönnunum.