Viljja minnka brotthvarf úr framhaldsskólum með námsgagnastyrkjum

Námsgagnastyrkur handa framhaldsskólanemum yrði fljótir að skila þjóðfélagslegum ávinningi fyrir samfélagið í heild sinni. Þetta er mat Ólafs Hjartar Sigurjónssonar, skólameistara Fjölbrautaskólans við Ármúla, og Steins Jóhannssonar, konrektors við Menntaskólann í Hamrahlíð. 

Þeir birtu grein í Fréttablaðinu í dag þar sem þeir gera brotthvarf nemenda í íslenskum framhaldsskólum að umræðuefni. Þeir segja ýmsar skýringar hafa verið nefndar en benda á að samkvæmt nýlegum rannsóknum vinna fimmtán til tuttugu prósent framhaldsskólanemenda fimmtán klukkustundir eða meira á viku með námi.

Það hafi áhrif á skólasókn og námsárangur en þeir spyrja sig hvers vegna framhaldsskólanemar þurfa að vinna svo mikið með námi, og spyrja jafnframt hvort það megi annaðhvort rekja til bágborins efnahags fjölskyldna þeirra eða einfaldlega þarfarinnar að vera þátttakandi í neyslusamfélaginu.

Þeir nefna að á Norðurlöndunum fái nemendur yngri en átján ára frí námsgögn sem hafi þau áhrif að ekki sé jafnmikil þörf fyrir að vinna með námi. Brotthvarf sé töluvert minna á Norðurlöndunum en á Íslandi og draga megi þá ályktun að þar vinni nemendur minna með skóla. 

Kostnaður við kaup á námsgögnum fyrir framhaldsskólanemendur getur hlaupið á tugum þúsunda á hverri önn og það geti reynst efnalitlum fjölskyldum erfitt að koma til móts við nemendur yngri en átján ára sem stunda nám í framhaldsskóla.

Þeir segja að enn hafi enginn mennta- og menningarmálaráðherra mælt fyrir slíkum stuðningi til kaupa á námsgögnum sem myndi að þeirra mati hafa mjög jákvæð áhrif á framhaldsskóla.

Átta þúsund nemendur stunda nám í framhaldsskólum sem eru undir átján ára aldri. Ef þeir ættu kost á námsgagnastyrk fyrstu fjórar annirnar í framhaldsskóla þá telja þeir Ólafur og Steinn að það gæti skilað sér í minni vinnu nemenda með skóla, minna brotthvarfi, betri námsárangri og að nemendur lykju námi tilskyldum tíma.