Vill breyta búvörusamningnum strax

Benedikt Jóhannesson, fjármála- og efnahagsráðherra, segir tímabært að gera strax breytingar á búvörusamning sauðfjárbænda. Ráðherrann gagnrýndi samninginn harðlega í grein sinni í Viðskiptablaðinu í dag.

Í greininni, sem titluð er Búvörusamningurinn er rót vanda sauðfjárbænda, segir Benedikt að vel komi til greina að ríkið reyni að leysa vandann sem steðjar að sauðfjárframleiðslu. Það verði hins vegar ekki gert með núverandi samningum, þar sem ríkið sjálft stuðlar að offramleiðslu og lágu vöruverði.

„Samningurinn sjálfur er vandinn. Því fyrr sem forsvarsmenn bænda fallast á að breyta honum, þannig að framleiðslutengingum sé hætt, því fyrr er hægt að finna lausn á þeim vanda sem nú blasir við. Almenningur og bændur eiga skilið að fá góðan samning sem gera landbúnað samkeppnishæfari og lífskjör allra Íslendinga betri,“ skrifar Benedikt.

„Þess vegna kemur vel til greina að ríkið komi að því að leysa tímabundinn vanda í sauðfjárframleiðslu, en það verður ekki gert meðan í gangi er búvörusamningur þar sem ríkið stuðlar að offramleiðslu og þar með lágu afurðaverði,“ skrifar Benedikt.

Tímabært að breyta samningum

Í samtali við fréttamann Bylgjunnar í dag vegna málsins sagði Benedikt að nú væri tímabært að gera breytingar á búvörusamningnum, í samráði við bændur.

„Ég held það væri tímabært að gera það núna strax. Við sjáum það hvað greinin er búin að lenda í miklum vandræðum, bara á fyrsta ári samningsins,“ sagði Benedíkt.

„Ég held að það sé mjög mikilvægt að bændur hafi frumkvæði að því að reyna að breyta um samning þannig að það sé traustur rekstrargrundvöllur hjá þeim sem að eru að vinna í greininni.“

Afleitt að ríkið borgi fyrir eitthvað sem er óskynsamlegt

Í grein sinni skrifar Benedikt að Viðreisn hafi strax í fyrra bent á að búvörusamningurinn væri meingallaður og að á ferðum sínum um landið hafi hann aldrei hitt bændur sem væru ánægðir með samningana.

Benedikt segir það enn fremur afleita stefnu að „ríkið borgi fyrir eitthvað sem er óskynsamlegt, til dæmis að framleiða meira á markað sem er mettaður,“ og vísar þar í lækkun á vöruverði vegna samningsins, og þar með aukna framleiðni bænda til að bæta upp fyrir tekjuskerðingu vegna lækkunarinnar.

Grein Benedikts má lesa í heild sinni hér.