Landsmönnum fjölgar og orðnir 344 þúsund talsins

Landsmönnum fjölgaði um 3.850 á 2. ársfjórðungi. Þetta kemur fram í frétt Hagstofunnar nú í morgun. Þar segir að í lok 2. ársfjórðungs þessa árs hafi á Íslandi búið 343.960 manns. Karlar eru fleiri, sem stangast reyndar á við þrálátar furðufréttir um að ríkisstjórn Íslands greiði erlendum karlmönnum sérstaklega fyrir að koma til landsins til að giftast íslenskum konum vegna karlahallæris. Karlar eru 174.810 á móti 169.150 konum. Sé litið til búsetu þá búa langflestir á höfuðborgarsvæðinu eða 219.900 manns.

Þessar tölur skýrast að verulegu leyti af aðfluttum erlendum einstaklingum sem eru 3.130 fleiri en þeir sem fluttust frá landinu. Og þar eru talsvert fleiri karlar en konur. „Á 2. ársfjórðungi fæddust 1.000 börn, en 550 einstaklingar létust. Á sama tíma fluttust 3.400 einstaklingar til landsins umfram brottflutta.

Aðfluttir einstaklingar með íslenskt ríkisfang voru 270 umfram brottflutta, en aðfluttir erlendir ríkisborgarar voru 3.130 fleiri en þeir sem fluttust frá landinu,“ segir í frétt Hagstofunnar. Sé litið til þess hver er helsti áfangastaður brottfluttra Íslendinga þá er það Danmörk en þangað fluttust 130 manns á 2. ársfjórðungi. Þangað og svo til Noregs og Svíþjóðar fluttust 270 íslenskir ríkisborgarar af 430 alls. Af þeim 590 erlendu ríkisborgurum sem fluttust frá landinu fóru flestir til Póllands, 150 manns.

Flestir þeirra Íslendinga sem flytjast aftur til landsins koma frá Danmörku eða 170, frá Noregi 190 og Svíþjóð 110 sem er vel rúmur helmingur þeirra 710 sem komu aftur heim, en þeir eru samtals 480. Hins vegar er Pólland upprunaland flestra þeirra erlendu ríkisborgara sem koma til landsins en þaðan fluttust 1.670 til landsins af alls 3.720 erlendum innflytjendum. „Litháen kom næst, en þaðan fluttust 490 erlendir ríkisborgarar til landsins. Í lok 2. ársfjórðungs bjuggu 34.460  erlendir ríkisborgarar á Íslandi.“