Harry Potter langt kominn á fertugsaldurinn en lesinn sem aldrei fyrr

Norðlenskir bókaormar, ungir sem aldnir, lögðu leið sína á Amtsbókasafnið á Akureyri á mánudaginn. Tilefnið var opnun nýrrar og endurbættrar unglingadeildar safnsins, sem var látin samtvinnast 37 ára afmæli galdrastráksins góðkunna, Harry Potter.

Hrönn Björgvinsdóttir, bókavörður á Amtsbókasafninu á Akureyri, er einn skipuleggjenda hátíðahaldanna. Hún segir Harry Potter-seríuna enn á meðal þeirra vinsælustu á safninu og því hafi verið litið til bókanna þegar velja átti skreytingar fyrir unglingadeildina.  

„Það var þannig að við ákváðum að gera endurbætur á unglingadeildinni hjá okkur. Þá fór ég aðeins að rýna í útlánatölur síðustu ára og þá kom í ljós að Harry Potter er á topp tíu listanum á hverju einasta ári,“ segir Hrönn.

„Þannig að það þýðir það að það kemur ný og ný kynslóð og tekur hann út, jafnvel þótt hann sé kominn vel á fertugsaldurinn,“ bætir hún við.

Fengu safngripi frá einlægum aðdáanda í sumarstarfi

Bókavörðunum á safninu þótti því tilvalið, með tilliti til þemans sem varð fyrir valinu, að svipta hulunni af deildinni á 37 ára afmæli galdrastráksins.

„Þannig að við tókum okkur til í sumar og breyttum unglingadeildinni í lestarstöðina í bókunum. Þá fannst okkur þess vegna alveg upplagt að hafa opnun á afmælisdegi Harrys.“

Hrönn segir Amtsbókasafnið einnig búa svo vel að sumarstarfsmaður, sem hóf störf nú í sumar, sé einlægur Harry Potter-aðdáandi. Starfsmaðurinn lánaði safninu ýmiss konar muni tengda bókunum sem hafðir voru til sýnis á opnuninni.

Þá segir Hrönn bækurnar ákveðnum töfrum gæddar, að þær brúi bilið milli ungra og eldri lesenda.

„Þetta eru bækur sem eru tenging milli barnabóka og unglingabóka. Hann er alltaf vinsæll, bæði á meðal barna og fullorðinna, og er næstum alltaf í útláni.“

Hér að neðan má sjá myndir frá 37 ára afmæli Harry Potter og opnun hinnar endurbættu unglingadeildar.