Brýna það fyrir atvinnubílstjórum að virða reglur um hvíldartíma

Samgöngustofa brýnir fyrir atvinnubílstjórum stórra ökutækja, eins og til að mynda hópbifreiða, að aka af stað óþreyttir og virða reglur um hvíldartíma.

Þetta kemur fram í fréttatilkynningu frá stofnuninni en þar segir að aksturstími hvern dag skuli ekki vera lengri níu klukkustundir og hlé skuli gera á akstri eftir 4,5 klukkustundir.

„Reglur um aksturs- og hvíldartíma eru ekki settar að ástæðulausu, heldur er markmið þeirra að auka öryggi í umferðinni og vinnuvernd ökumanna. Þeir eiga ekki undir neinum kringumstæðum að þurfa að aka óhóflega lengi í senn þannig að velferð og öryggi farþega og annarra vegfarenda sé hætta búin.

 

Fyrirtækjum er skylt að varðveita upplýsingar úr rafrænum ökuritum um akstur sinna bifreiða og ökumanna á þeirra snærum og einnig að veita þessar upplýsingar eftirlitsmönnum ef um það er beðið,“ segir í tilkynningunni.