Gistinóttum á hótelum fjölgaði um 6 prósent

Gistinætur á hótelum í júní voru 392.900 sem er 6 prósenta aukning miðað við júní 2016. Þetta segir í frétt Hagstofu Íslands sem hefur að undanförnu rannsakað, greint og birt ýmsar tölur sem snúa að ferðaþjónustu.

Bandaríkjamenn flestir

Í fréttinni kemur fram að um 55 prósent allra gistinátta voru á höfuðborgarsvæðinu eða 217.800, sem er 3 prósenta aukning miðað við júní 2016. Gistinætur á Suðurnesjum voru 25.800, sem er 55 prósenta aukning frá fyrra ári, en einnig var 11 prósenta aukning á Suðurlandi, þar sem gistinætur voru 73.200.

„Gistinætur á Vesturlandi og Vestfjörðum voru 23.000 og á Austurlandi voru þær 16.200, sem í báðum tilvikum er 3% samdráttur frá fyrra ári.“ Í fréttinni segir jafnframt að flestar gistinætur í júní áttu Bandaríkjamenn eða 113.300, þá koma Þjóðverjar með 61.600 og Bretar með 33.600, „en íslenskar gistinætur í júní voru 23.800.“

Gistinóttum Íslendinga fækkar

Gistinætur erlendra gesta voru 94 prósent af heildarfjölda gistinátta í mánuðinum, en þeim fjölgaði um 8 prósent frá sama tíma í fyrra á meðan gistinóttum Íslendinga fækkaði um 15 prósent. „Við þessa uppfærslu var tekið upp breytt verklag við mat á áreiðanleika flokkunar gistinátta eftir þjóðernum ferðamanna, sem breytti hlutfalli milli erlendra og íslenskra gistinátta frá því sem ella hefði verið. Þessi fækkun íslenskra gistinátta milli ára skýrist að hluta af því að hlutfall íslenskra gistinátta gæti hafa verið ofmetið í fyrri tölum,“ segja þeir Hagstofumenn.

„Á tólf mánaða tímabili frá júlí 2016 til júní 2017 var heildarfjöldi gistinátta á hótelum 4.165.000 sem er 27% aukning miðað við sama tímabil árið áður.“

Rúmlega 80 prósenta nýting á hótelherbergjum

Mikil uppbygging hefur að undanförnum árum á gistirýmum og hótelbyggingum. Þessar tölur segja því ekki alla söguna en Hagstofufólk greindi einnig nýtingu gistirýmis og komst að því að um er að ræða 81 prósenta nýtingu herbergja á hótelum í júní, sem er lækkun um 0,5 prósentustig frá júní 2016 þegar nýtingin var 81,5 prósent

„Á sama tíma hefur framboð gistirýmis aukist um 8,5%, mælt í fjölda herbergja. Nýtingin var best á höfuðborgarsvæðinu, eða um 87,6%.“

Hagstofan vekur athygli á því að hér er eingöngu átt við gistinætur á hótelum sem opin eru allt árið. „Til þessa flokks gististaða teljast hvorki gistiheimili né hótel sem eingöngu eru opin yfir sumartímann. Tölur fyrir 2017 eru bráðabirgðatölur.“

Unnið er að því að uppfæra tölur fyrir fyrri ár til samræmis við það að sveitarfélagið Höfn í Hornafirði telst nú með Suðurlandi, í stað Austurlands áður.