Komu í veg fyrir mengunarslys á vatnsverndarsvæði í Hörgárdal

Olíuflutningabíllinn sem valt við Búðará í Hörgárdal er kominn upp á veg og er aðgerðum að ljúka á vettvangi. Segja má að tekist hafi að koma í veg fyrir mengunarslys þar sem afar lítið af olíu lak úr bílnum.

3000 lítrar af díselolíu voru í bílnum en óhappið á vatnsverndarsvæði Norðurorku í Hörgárdal og því var allt kapp lagt á að koma í veg fyrir að olían læki úr bílnum.

„Mengunin sem kom frá þessu var algjörlega minniháttar. Það lekur alltaf einhver olía eða glussi þegar svona bílar fara á hliðina en það var ekkert meira í þessu tilviki en vanalega. Þetta var bara algjört smotterí sem var hægt að hreinsa upp með sérstökum mottum svo þetta slapp alveg til,“ segir Jóhannes Sigfússon, varðstjóri hjá lögreglunni á Norðurlandi eystra, í samtali við Vísi.

Ekki þurfti að dæla úr bílnum en þegar það er gert eru alltaf töluverðar líkur á að meiri olía leki. Það var hins vegar ekki í þessu tilfelli.

„Þetta var vandasamt verk en kranabílstjórar og aðrir sem komu að þessu vönduðu sig svo þetta gekk vel og það varð ekki mengun af þessu,“ segir Jóhannes.

Ekki liggur fyrir um tildrög slyssins en lögreglan fer með rannsókn málsins. Ökumaður bílsins var fluttur á slysadeild með minniháttar meiðsl.

Fjöldi fólks kom að aðgerðunum í Hörgárdal því auk lögreglu var slökkviliðið kallað til, kranabílar, starfsmenn Norðurorku og björgunarsveitarmenn frá björgunarsveitinni súlum. Reimar Viðarsson sem stjórnaði aðgerðum svæðisstjórnar Landsbjargar segir að það hafi farið betur en á horfðist í upphafi.

„Í fyrsta lagði að ökumaðurinn slasaðist ekki alvarlega og svo númer tvö að það varð engin mengun vegna þessa,“ segir Reimar í samtali við Vísi.