Kíkt í körfur í Costco

Costco í Kauptúni opnaði með pomp og prakt í liðinni viku og hafa tugþúsundir Íslendinga lagt leið sína í verslunina. Um fátt er rætt meira á mannamótum en hin ýmsu kostakaup sem fólk hefur gert í Costco að undanförnu og hafa þúsundir Íslendinga á Facebook deilt myndum af hinum ýmsu vörum og verðmiðum úr versluninni - hver öðrum kátari. 

Sjá einnig: Íslendingar ofuráhugasamir um verðlagningu í Costco

Við litum við í vinsælustu verslun landsins og fengum aðeins að skyggnast ofan í körfurnar hjá nokkrum kátum viðskiptavinum.



Stefán Ólafur Guðmundsson

Hér ofan í er gos sem ég er að kaupa fyrir vinnuna. Þetta er um helmingi ódýrara þannig að þetta var engin spurning. 

Ég er að vinna hjá Kraftvélum og við erum með vélasýningu á Flúðum með dráttarvélar, New Holland og Case. Gestir og starfsmenn geta því gætt sér á góðu gosi með.

Svanhildur Guðmundsdóttir og Pálmi Stefánsson

Kötturinn nýtur góðs af þessari ferð okkar. Við vorum meira komin til að skoða og trúlega kaupum við meira næst

Okkur leist vel á þessa búð. Við ætluðum bara að kaupa einhvern góðan mat handa kisu en fórum inn með opnum hug og gengum út með bætiefni og batterí í sjónvarpið meðal annars.

En aðalatriðið var að kaupa handa kisu enda úrvalið hér gott. Við viljum gefa henni fjölbreytta fæðu.

Þetta er skógarköttur og heitir auðvitað Stefán.

Grímur Ziemsen

Ég keypti Kitchen Aid hrærivél. Hún kostaði sama og ekki neitt eða um 50 þúsund.

Ég hef verið lengi að skoða svona vélar og fyrst þær eru svona ódýrar hér þá stökk ég á eina.

Mamma keypti síðan einhverjar kökur. Ég gæti ekki verið sáttari.

Kristín Jóna Sigurjónsdóttir, Tinna Torfadóttir, Theodóra Haraldsdóttir, Sigurjón Björn Torfason

Ég er að kaupa gosið fyrir útskriftarveislu stelpunnar minnar sem var að klára Verslunarskólann. Það er því verið að nýta verðið enda um 70 manna veisla.

Þau sendu mig svo bara í röðina og héldu áfram að skoða sjálf. Nýttu tímann. Ég hefði þurft lengri tíma en það sem ég hef séð finnst mér gott. Ég er að koma hingað í fyrsta sinn.

Mamma er hérna með mér, hún er að koma í þriðja sinn og elskar þessa búð – svei mér ef hún er ekki á prósentum.

Steinar Baldursson

Þetta er í fyrsta sinn sem við komum. Við vorum mætt rúmlega við opnun og þetta er búið að vera gaman. Við erum að kaupa kaffi, vöfflur, mörk fyrir krakkana, það er ýmislegt fyrir alla, dæla til að pumpa í dekk og fleira.

Við erum ekki svo áköf að við gerðum okkur sérferð en fyrst við erum í bænum þá varð maður að kíkja. Við búum á Hólmavík og ég pantaði mitt kort á netinu. Ég kem aftur þegar eitthvað er til – það er nefnilega rosalega mikið búið.

Ég er um tvo og hálfan að keyra hingað og svo tekur maður Costco-bensín úti á horni og brunar heim.

Þórhallur Eyþórsson

Ég var búinn að kíkja á aðra staði og þetta er langbesta verðið sem ég hef fundið þannig að ég tók hana. Ég þurfti að endurnýja sögina og hér býðst besta verðið þannig að þetta var engin spurning.

Patrekur Jóhannesson

Ég er nú aðallega í matvörunni. Kjúklingur og fleira sem konan valdi að mestu. Sú stutta fann hafrakökur sem henni leist vel á. Ég man nú ekki eftir Costco þar sem ég hef búið og þetta er í fyrsta sinn sem ég hef komið. Ætli gíraffinn komi ekki ofan í körfuna næst