Ritstjórinn smellti sjálfum sér á forsíðuna

Olgeir Helgi Ragnarsson er ritstjóri Íbúans, sem er frétta- og auglýsingablað sem gefið er út og dreift í Borgarnesi og nágrenni. Olgeir er einnig rekstrarfræðingur og tenór og á forsíðu nýjasta tölublaðs Íbúans er mynd af Olgeiri Helga sjálfum. Og vakin sérstök athygli á tónleikum sem hann er að halda.

„Jú, þetta er stærsti viðburðurinn þessa vikuna,“ segir Olgeir Helgi í samtali við Vísi. „Ég er í námi í tónlistarskólanum og þetta er sú aðferð sem skólinn beitir til að auglýsa framhaldsprófstónleika þegar þeir eru.“

Og nú hittir það svo á að ritstjórinn sjálfur er sá sem er að fara að halda tónleikana. Ekki hægt að láta hann gjalda þess að vera ritstjóri blaðsins, eða hvað? Stóð ekkert í þér að setja sjálfan þig á forsíðuna?

„Jú, það stóð í mér,“ viðurkennir Olgeir Helgi.

Efnið í blaðinu að frumkvæði skólans

Þannig er nefnilega að líkast til stangast þetta á við siðareglur Blaðamannafélags Íslands, 5. grein nánar tiltekið þar sem sagt er að blaðamaður skuli varast að lenda í „hagsmunaágreiningi, til dæmis með því að flytja fréttir eða frásagnir af fyrirtækjum eða hagsmuna- samtökum þar sem hann á sjálfur aðild.“ Í sömu grein segir reyndar einnig að hann skuli gæta þess að rugla ekki saman ritstjórnarlegu efni, sem hefur augljóst upplýsinga- og fræðslugildi, og auglýsingum í myndum og/eða máli.“ Sú regla virðist reyndar virt að vettugi á Íslandi, ekki bara í Íbúanum.

„Já, menn geta skemmt sér yfir þessu,“ segir Olgeir Helgi. „En þetta er ekki að mínu frumkvæði, heldur skólans.“

En, þú ert ritstjóri blaðsins?

„Jújú.“

Eiginkona Olgeirs skólastjóri tónlistarskólans

Og hæg eru heimatökin í Borgarbyggð en skólastjóri Tónlistarskólans í Borgarfirði, sem kaupir auglýsinguna í blaði Olgeirs er Theodóra Þorsteinsdóttir en hún er einmitt eiginkona Olgeirs Helga.

Það hampar manni enginn nema maður geri það sjálfur, Ísland er lítið og Borganes minna. Vísir spurði Olgeir Helga hvað hann ætlaði að syngja og ljóst mátti vera að honum þótti miklu meira gaman að tala um það en einhverja núansa á siðareglum blaðamanna.

„Þetta eru ... íslensk og erlend sönglög og aríur. Þetta heitir framhaldspróf í söng, svokallað 8. stig, stúdentspróf í söng, ef það má orða það þannig. Passar ágætlega, 30 ár síðan ég varð stúdent úr framhaldsdeild Samvinnuskólans. Hún var við Suðurlandsbraut í Reykjavík. Þeim gagnmerka skóla. Annar hluti prófsins er að halda einsöngstónleika þar sem prófdómari kemur og metur frammistöðuna.“

Siðanefndin boðin sérstaklega velkomin á tónleikana

Olgeir hefur verið mörg undanfarin ár í Óperukórnum þar sem hann hefur sungið undir stjórn Garðas Cortes. „Og svo höfum við fjölskyldan verð með tónleika, hjónin og tvær dætur okkar, jólatónleika í kirkjunni í Borgarnesi og það hefur alltaf verið húsfyllir. Síðast hittist það svo á að við vorum á Kanarí og við héldum tónleika í túristakirkjunni þar, og það var kjaftfullt hús. Skemmtileg upplifun.“

Og tónleikarnir eru klukkan fimm á sunnudaginn. „Aðgangur ókeypis og allir hjartanlega velkomnir. Siðanefnd Blaðamannafélagsins er sérstaklega boðin velkomin.“