Fylkir á toppnum eftir nauman sigur á nýliðunum | Öll úrslitin úr Inkasso-deildinni

HK - Leiknir R. 3-2

1-0 Árni Arnarson (17.), 2-0 Ingiberg Ólafur Jónsson (32.), 2-1 Ragnar Leósson (35.), 2-2 Halldór Kristinn Halldórsson (56.), 3-2 Ágúst Freyr Hallsson (90.+2).

Fram - Haukar 2-2

0-1 Arnar Aðalgeirsson (27.), 0-2 Björgvin Stefánsson (75.), 1-2 Simon Smidt (82.), 2-2 Ivan Bubalo (90.+4).

Grótta - Fylkir 1-2

1-0 Andri Þór Magnússon (16.), 1-1 Hákon Ingi Jónsson (28.), 1-2 Daði Ólafsson (90.).

ÍR - Þróttur 1-2

0-1 Emil Atlason (69.), 0-2 Daði Bergsson (77.), 1-2 Jón Gísli Ström (90.).

Fylkir er á toppnum í Inkasso-deildinni í fótbolta eftir nauman sigur á nýliðum Gróttu, 2-1, á útivelli í kvöld en Árbæingar, sem unnu Þór í fyrstu umferðinni, skoruðu sigurmarkið í uppbótartíma.

Andri Þór Magnússon kom Gróttu í 1-0 á 16. mínútu en Hákon Ingi Jónsson, sem raðaði inn mörkum fyrir HK á síðustu leiktíð, jafnaði metin á 28. mínútu.

Sjá einnig:Sjáðu aukaspyrnumarkið hjá Smidt og hin þrjú í Laugardalnum | Myndband

Þegar allt stefndi í markalaust jafntefli og gott stig hjá Gróttunni var það Daði Ólafsson sem tryggði Fylkismönnum sigurinn en liðið er með sex stig eftir tvo leiki. Grótta er með eitt stig.

Fram kom til baka og náði í stig á móti Haukum eftir að lenda 2-0 undir á Laugardalsvellinum en það voru Arnar Aðalgeirsson og Björgvin Stefánsson sem skoruðu á 27. og 75. mínútu fyrir Hauka. Björgvin með annað markið sitt í jafnmörgum leikjum.

Endurkoma Framara fram dramatísk því Simon Smidt, sem spilaði fyrir ÍBV í Pepsi-deildinni í fyrra, minnkaði muninn með marki beint úr aukaspyrnu á 82. mínútu. Stórglæsilegt mark.

Fjórum mínútum var bætt við leikinn og á fjórðu mínútu í uppbótartíma fengu Haukar dæmda á sig vítaspyrnu. Úr henni skoraði króatíski markahrókurinn Ivan Bubalo sitt annað mark í sumar. Lokatölur, 2-2. Haukar eru með fjögur stig í þriðja sæti en Fram er í öðru sæti með jafnmörg stig eftir tvær umferðir.

Mörkin úr leiknum má sjá neðst í fréttinni.

Það var líka heldur betur dramatík í Kórnum í Kópavogi þar sem HK vann frábæran 3-2 sigur á Leikni í svakalegum leik.

HK komst í 2-0 með mörkum Árna Arnarsonar og Ingibergs Ólafs Jónssonar á fyrsta hálftímanum en Ragnar Leósson, sem spilaði fyrir HK í fyrra, minnkaði muninn í 2-1 á 35. mínútu.

Ragnar hélt áfram að vera gömlu félögunum erfiður því hann lagði upp jöfnunarmarkið fyrir Halldór Kristinn Halldórsson á 56. mínútu og staðan, 2-2.

Hetja HK-inga var svo Ágúst Freyr Hallsson sem skoraði sigurmarkið, 3-2, á annarri mínútu í uppbótartíma og þar við sat. HK með þrjú stig eftir tvo leiki en Leiknismenn aðeins með eitt stig.

Þróttur, sem tapaði fyrir Haukum í fyrstu umferðinni, náði svo í sinn fyrsta sigur þegar það lagði nýliða ÍR, 2-1, í Breiðholtinu. Emil Atlason og varamaðurinn Daði Bergsson skoruðu fyrir Þróttara en Jón Gísli Ström minnkaði muninn úr vítaspyrnu í uppbótartíma.

Þróttur er með þrjú stig í sjötta sæti en ÍR-ingar í ellefta sæti án stiga eftir fyrstu tvo leikina.

Upplýsingar um markaskorara fengnar að hluta frá fótbolti.net.

Fram - Haukar 2-2