Kajakræðararnir voru í sjónum í eina og hálfa klukkustund

Rannsóknardeild lögreglunnar á Suðurlandi hefur í dag unnið að rannsókn kajakslyssins við Þjórsárós. Þetta kemur fram í tilkynningu frá lögreglunni en þar segir að mennirnir tveir hafi farið á kajökum frá bökkum Þjórsár, nokkuð ofan við ósinn, og réru að ósnum þar sem þeir komu að landi á vesturbakka árinnar.

Þeir fóru síðan út aftur en lentu þá í broti í ósmunnanum og þá hvolfdi kajökunum og mennirnir misstu af þeim. 

Kajakana rak að landi austan við ósinn en mennina rak frá landi um tvo kílómetra þar sem áhafnir Gæsluþyrlnanna sáu til þeirra og hífðu upp úr sjónum.

Mennirnir höfðu þá verið í sjónum í um eina og hálfa klukkustund. Kajakræðararnir voru þarna á eigin vegum í tómstundaiðkun.

Nafn þess látna verður ekki gefið upp að svo komnu að beiðni aðstandenda að sögn lögreglu.

Sá sem lést var Íslendingur en félagi hans er Frakki.