Svala braut líkast til fánalögin

Líkast til hefur Svala Björgvinsdóttir brotið fánalög í sérstakri opnunarhátíð. Marta Magnúsdóttir skátahöfðingi Íslands telur að það hljóti að vera.

Í sérstakri opnunar-seremóníu Eurovision-söngvakeppninnar í Úkraínu voru keppendur kallaðir hver um sig á torg þar sem þeir gengu að fána lands síns, krotuðu á hann skilaboð og við svo búið var fáninn sendur til lofts bundninn við helíumblöðrur.

Fulltrúi Íslands, Svala Björgvinsdóttir mætti samviskusamlega á torgið, ásamt Felix Bergssyni, skrifaði „Áfram Ísland, Svala“ og teiknaði hjarta við. Þá tók hún við bréfi frá forseta Úkraínu, Petro Poroshenko, las það upp og þar með var athöfninni lokið.

Hér má sjá hvernig þetta gekk fyrir sig.

En, við nánari athugun virðist sem um augljóst brot sé á fánalögum. Þar sem segir til dæmi að „Engin aukamerki má hafa í fánanum önnur en þau, sem heimiluð eru í fánalögum, reglugerðum samkvæmt þeim eða forsetaúrskurðum um fánann.“

Skátarnir eru sérlegir verndarar íslenska fánans og Vísir bar þetta undir Mörtu Magnúsdóttur skátahöfðingja. Hún telur víst að um brot sé að ræða.

„Jú það er líklegast rétt túlkað hjá þér að þarna hafi hún sett aukamerki á fánann og því sé um að ræða brot á fánalögunum,“ segir Marta sem veltir því fyrir sér hvort öll þátttökulöndin hafi tekið þátt í slíkum gjörningi? Svo virðist vera.

Marta reyndar vill nota tækifærið og óska Svölu góðs gengis.

„Og þú mátt endilega skila kveðju til lagahöfunds Montenegró en hann er einmitt skátahöfðingi Montenegró. Með skátakveðju,“ segir Marta.