Veðurfræðingar boða vor: Hiti gæti farið í 17 stig eftir helgi

Það hlýnar heldur í veðri eftir helgi að sögn Þorsteins V. Jónsson, veðurfræðings á Veðurstofu Íslands. Gengur hann svo langt að spá því að það muni hreinlega vora á mánudag, eins og spárnar líta út í dag og gæti farið allt upp í 16 - 17 stiga hita á norðanverðu landinu.

„Það verður heldur vetrarlegt veður á morgun og á föstudag en svo hlýnar á sunnudeginum og útlit fyrir nokkuð hlýtt og gott veður eftir helgi,“ segir Þorsteinn. Hann segir hlýrra loft leika um landið eftir helgi og að kalda loftið sé á undanhaldi eins og spárnar líta út í dag, og mun þetta ástand vara í nokkra daga miðað við þær.

„Og við vonum að þetta muni vara sem lengst,“ segir Þorsteinn.

Hann segir að það muni verða fremur hlýtt á Norðurlandi eftir helgi, það er að segja í Eyjafirði og nágrenni hans og þá er ekki útilokað að hlýtt gæti orðið á Vestfjörðum.

Þessu mun þó fylgja strekkings suðaustanátt á Suður- og Austurlandi, sem þýðir að veður verður mun skaplegra á þeim stöðum sem eru hlémegin við þá átt, það er að segja Norður- og Vesturland.

Veðurhorfur á landinu næstu daga:

Á morgun:Sunnan 8-15 og rigning en hægari og þurrt á N- og A-landi til kvölds, síðan væta með köflum þar. Sums staðar slydda eða snjómugga til fjalla S- og V-til um kvöldið og kólnar í veðri.

Á föstudag:Suðaustan 13-18 m/s og úrkomulítið N-land, annars rigning eða slydda, en snjókoma til fjalla. Hægari vindur á S- og V-landi um kvöldið. Hiti 2 til 10 stig, hlýjast fyrir norðan.

Á laugardag:Suðaustan 8-15 m/s, hvassast á annesjum. Rigning SA-lands, annars skúrir eða slydduél, en þurrt að mestu fyrir norðan. Hiti 3 til 10 stig, mildast NA-lands.

Á sunnudag, mánudag og þriðjudag:Stífar austlægar áttir, væta með köflum og hægt hlýnandi veður.