Valur fær mikinn liðsstyrk í kvennakörfunni | Guðrún Gróa snýr aftur í boltann

Guðrún Gróa Þorsteinsdóttir mun spila með Val í Domino´s deild kvenna næsta vetur en hún skrifaði í dag undir tveggja ára samning.

Guðrún Gróa lék síðast í efstu deild tímabilið 2013 til 2104 en þá varð hún Íslandsmeistari með Snæfelli. Hún skoraði að meðaltali 10,4 stig í leik, tók 7,3 fráköst auk þess að eiga 2,6 stoðsendingar.

Guðrún Gróa fór á kostum í úrslitakeppninni 2014 þegar Snæfellskonur urðu Íslandsmeistarar í fyrsta sinn þrátt fyrir að missa bandaríska leikmann sinn í meiðsli.

Í úrslitakeppninni var hún með 13,5 stig, 8,9 fráköst og 2,5 stoðsendingar í leik. Í undanúrslitaeinvíginu á móti Val var hún með 21 stig, 12 fráköst, 6 stoðsendingar og 35 framlagsstig í oddaleiknum.

Guðrún Gróa var erlendis tímabilið 2014-2015 en lék síðan í 1. deildinni með KR tímabilið 2015-2016 þar sem hún lék einmitt undir stjórn Darra Freys Atlasonar sem tók nýverið við liði Vals. Hún skoraði að meðaltali 15,4 stig í leik, tók 13,3 fráköst og átti 2,7 stoðsendingar.

„Ég er virkilega ánægður með að fá tækifæri til þess að vinna aftur með Gróu,” segir Darri Freyr Atlason þjálfari Vals í fréttatilkynningu frá Valsmönnum.

„Gróa er frábær leikmaður og enn betri manneskja. Hún bindur saman liðsheildina með smitandi varnarleik, auðmýkt og fórnfýsi og verður mikill styrkur fyrir okkur innan vallar sem utan. Við hjá Val leggjum mikið upp úr því að gera rétta hluti en ekki síður því að gera hlutina rétt. Gróa er fullkomin viðbót við liðsheild sem vinnur eftir þeim skilaboðum,“ sagði Darri Freyr.