Sláandi skýrsla Al­þjóða­veður­fræði­stofnunarinnar um for­dæma­lausar lofts­lags­breytingar

Niðurstöður á mati sem Alþjóðaveðurfræðistofnunin hefur gert á loftslagi Jarðarinnar árið 2016 sýna fordæmalausa hlýnun um allan hnöttinn, lítinn ís bæði á Norður-og Suðurpólnum og hækkun sjávarborðs.

Hnattræn hlýnun er að mestu tilkomin vegna útblásturs af manna völdum þó að veðrafyrirbrigðið El Niño hafi einnig haft áhrif á hærri hitatölur á liðnu ári.

Hitatölurnar halda svo bara áfram að hækka, þrátt fyrir að El Niño hafi ekki verið jafn öflugur og í fyrra, þar sem hitamet voru slegin í Bandaríkjunum í febrúar síðastliðnum og hitabylgjur við póla jarðar bræða ís og jökla þar.

„Jafnvel þó að El Niño sé ekki svo öflugur í ár þá erum við að sjá ótrúlegar breytingar um allan heim sem setja okkur takmörk þegar kemur að skilningi okkar á loftslagi Jarðarinnar. Við erum í raun núna á ókönnuðu svæði,“ er haft eftir David Carlson, forstjóra Alþjóðaveðurfræðistofnunarinnar, á vef Guardian.

Grípa þurfi tafarlaust til aðgerða

Jeffrey Kargel, jöklafræðingur við Háskólann í Arizona, segir að Jörðin sé nú pláneta þar sem ríki umrót vegna loftslagsbreytinga af mannavöldum.

„Almennt er það svo að svona miklar breytingar hjálpa ekki siðmenningunni sem þrífst best í stöðugleika,“ segir Kargel.

Annar vísindamaður, David Reay, segir skýrslu Alþjóðaveðurfræðistofnunar sláandi og að það þurfi tafarlaust að grípa til aðgerða þar sem aldrei hafi jafnmikið verið í húfi og nú.

Í skýrslu stofnunarinnar er kallað eftir því að vísindamenn gagnrýni stefnu Donald Trump, Bandaríkjaforseta, í loftslagsmálum en hann hyggst skera niður fjármagn sem farið hefur í rannsóknir á loftslagsbreytingum.

Segir Trump og Repúblikana stinga hausnum í sandinn

„Á meðan rannsóknir sýna að mannkynið hefur alltaf meiri og meiri áhrif á loftslagsbreytingar þá stinga Trump og Repúblikanar á þingi hausinn í sandinn,“ segir Sir Robert Watson, einn virtasti vísindamaður heims í loftslagsmálum en hann er prófessor við East Anglia-háskólann í Bretlandi og fyrrverandi formaður hóps sérfræðinga í loftslagsmálum hjá Sameinuðu þjóðunum.

„Börn okkar og barnabörn munu líta til baka á þá sem afneita loftslagsbreytingum og spyrja hvernig þeir gátu fórnað heilli plánetu fyrir ódýrt jarðefnaeldsneyti þegar kostnaðurinn við að gera ekki neitt er mun meiri en ávinningurinn af því að skipta yfir í lág-kolefnis hagkerfi,“ segir Watson.

Framkvæmdastjóri Alþjóðaveðurfræðistofnunar, Petteri Taalas, segir að þvert á það sem að Trump hyggst gera sé afar mikilvægt að halda áfram að setja fé í rannsóknir á loftslagsmálum.

Áhrif mannsins á loftslagsbreytingar verða alltaf augljósari

„Með áframhaldandi fjármagni í rannsóknir á loftslagsmálum getum við bætt við þekkingu okkar svo við eigum möguleika á að halda í við þær hröðu breytingar sem eru að verða á loftslagi jarðarinnar,“ segir Taalas.

Í skýrslu Alþjóðafræðistofnunarinnar segir að aukin áhætta mælist nú af öfgafullum veðrafyrirbrigðum vegna loftslagsbreytinga þar sem hitabylgjur á Suðurskautinu eru nú tíu sinnum líklegri en þær voru áður og sömuleiðis eru hitabylgjur á borð við þær sem voru í Ástralíu í febrúar tvisvar sinnu líklegri en áður.

„Þegar koltvísýringur mælist alltaf meiri og meiri í andrúmsloftinu þá eru áhrifin mannsins á loftslagsbreytingar alltaf augljósari og augljósari,“ segir Taalas.