Birna Brjánsdóttir borin til grafar í dag

„Jarðarförin er opin og í raun og veru má fólk koma. Svo er erfisdrykkja í flugskýli Landhelgisgæslunnar á eftir sem er líka opin,“ segir Sigurlaug Hreinsdóttir. Jarðarför dóttur hennar, Birnu Brjánsdóttur, fer fram frá Hallgrímskirkju í dag klukkan 15.

Birnu var ráðinn bani í janúar og stendur rannsókn á málinu nú yfir. Mikill fjöldi leitaði Birnu dagana eftir hvarf hennar.

Fjölmenni mætti í minningargöngu um Birnu í miðbæ Reykjavíkur laugardaginn 28. janúar en víða um land var Birnu minnst.

Fjölskylda Birnu afþakkar blóm og kransa en bendir þeim sem vilja minnast hennar á að styrkja Slysavarnafélagið Landsbjörg.

Fréttin birtist fyrst í Fréttablaðinu