Sjokkerandi töp Guðmundar og Dags í gær í sögulegu ljósi

Heimsmeistarakeppnin endaði snögglega fyrir íslensku þjálfaranna Guðmund Guðmundsson og Dag Sigurðsson þegar landslið þeirra duttu óvænt út úr sextán liða úrslitum HM í handbolta í gær.

Danmörk, lið Guðmundar Guðmundssonar, tapaði fyrir Ungverjalandi, og Þýskaland, landslið Dags Sigurðssonar, tapaði fyrir Katar. Bæði lið Ungverjalands og Katar enduðu í 4. sæti í sínum riðli, eins og Ísland, og bæði lið Þýskalands og Danmerkur voru búin að vinna fimm fyrstu leiki sína á HM í Frakklandi.

Það sem meira er landsliðin unnu hvor um sig einn stóran titil á síðasta ári. Þjóðverjar urðu Evrópumeistarar í Póllandi fyrir ári síðan og Danir unnu Ólympíugullið í Ríó í ágúst.

Þegar bæði Evrópumeistararnir og Ólympíumeistararnir detta út úr sextán liða úrslitum á sama degi er ekki úr vegi að skoða hvernig landsliðum í sömu sporum hefur gengið á HM undanfarna áratugi. Það þarf ekki að koma mörgum á óvart að þetta er söguleg slæmt.

Þjóðverjar enda í 9. sæti á HM í ár eða í nákvæmlega sama sæti og þegar þeir komu síðast á heimsmeistaramót sem ríkjandi Evrópumeistarar í Túnis 2005. Aðeins einum Evrópumeisturum hefur gengið verr en Evrópumeistarar Svía urðu aðeins í 13. sæti á HM 2003.

Svíar voru þá að fara í gegnum risastór kynslóðarskipti en Þjóðverjar eru með sitt Evrópumeistaralið á besta aldri.

Danir enda í 10. sæti á HM og aðeins eitt landslið hefur mætt á HM eftir sigur á Ólympíuleikum og ekki náð betri árangri. Króatar urðu aðeins í þrettánda sæti á HM í Kumamoto 1997, ári eftir á þeir unnu Ólympíugullið í Atlanta.

Á síðustu tuttugu árum hafði versti árangur Ólympíumeistara verið sjötta sæti hjá Frökkum á HM 2013 og hjá Rússum á HM 2001.



Ólympíumeistarar og næsta HM á eftir:

Danmörk á HM 2017 - 10. sæti (16 liða úrslit)

Frakkland á HM 2013 -  6. sæti (8 liða úrslit)

Frakkland á HM 2009 - Heimsmeistarar

Króatía á HM 2005 - Silfurverðlaun

Rússland á HM 2001 -  6. sæti (8 liða úrsliti)

Króatía á HM 1997 - 13. sæti (16 liða úrslit)

Rússland (Samveldið) á HM 1993 - Heimsmeistarar

Sovétríkin á HM 1990 - Silfurverðlaun

Júgóslavía á HM 1986 - Heimsmeistarar

Austur-Þýskaland á HM 1982 -  6. sæti (milliriðill)

Sovétríkin á HM 1978 - Silfurverðlaun

Júgóslavía á HM 1974 - Bronsverðlaun

Evrópumeistarar og næsta HM á eftir:

Þýskaland á HM 2017 - 9. sæti (16 liða úrslit)

Frakkland á HM 2015 - Heimsmeistarar

Danmörk á HM 2013 - Silfurverðlaun

Frakkland á HM 2011 - Heimsmeistarar

Danmörk á HM 2009 - 4. sæti

Frakkland á HM 2007 - 4. sæti

Þýskaland á HM 2005 - 9. sæti (milliriðill)

Svíþjóð á HM 2003 - 13. sæti (milliriðill)

Svíþjóð á HM 2001 - Silfurverðlaun

Svíþjóð á HM 1999 - Heimsmeistarar

Rússland á HM 1997 - Heimsmeistarar

Svíþjóð á HM 1995 - Bronsverðlaun