Ráðabrugg sendiráðsstarfsmanns náðist á falda myndavél

Sendiherra Ísraels á Bretlandseyjum hefur beðist afsökunar á því að starfsmaður sendiráðsins sagðist vilja taka Alan Duncan, undirráðherra breska utanríkisráðuneytisins, niður. Ummæli starfsmanns sendiráðsins náðust á upptöku með falinni myndavél.

Fjölmiðlar ytra segja Masot hafa látið þessi ummæli falla á veitingastað í Lundúnum í október síðastliðnum.

Hann sagði blaðamanni að Alan Duncan væri vandræðaseggur en sendiherra Ísraela, Mark Regev, hefur beðist afsökunar og komið þeim skilaboðum til fjölmiðla að þessi skoðun starfsmannsins endurspegli ekki skoðanir sendiráðsins né yfirvalda í Ísrael.

Umræddur starfsmaður - Shai Masot sat til borðs með Mariu Strizzolo, aðstoðarmanni Robert Halfon menntamálaráðherra Breta, og blaðamanni á vegum Al Jazeera fréttastofunnar sem villti á sér heimildir.

Masot sagði meðal annars: „Má ég láta þig fá nöfn þingmanna sem ég legg til að þú takir niður?“

Strizzolo svaraði því til að allir þingmenn Bretlands hefðu eitthvað sem þeir reyndu að fela og bætti Masot við: „Ég er með nokkra þingmenn. Hún veit hvaða þingmenn ég vil taka niður“ sagði Masot áður en hann nefndi utanríkisráðherrann.

Alan Duncan hefur gagnrýnt yfirvöld í Ísrael opinberlega fyrir landnemabyggðir sínar og stutt stofnun ríkis Palestínu en að sögn Masot var Duncan að „skapa mörg vandamál“ á meðan utanríkisráðherra Breta – Boris Johnson væri minna vandamál.

Strizzolo hefur hins vegar sagt að ummælin voru látin falla í hálfkæringi og þar af leiðandi ætti ekki að taka það alvarlega.

Utanríkismálaskrifstofa Bretlands sem og sendiráð Ísrael hafa bæði látið hafa eftir sér í tilkynningu að samband ríkjanna sé báðum ríkjum mikilvægt og því sé þetta mál úr sögunni.

Þetta er á meðal þess sem kemur fram í nýrri fjögurra þátta fréttaskýringu rannsóknarteymis Al Jazeera sem nefnist The Lobby og verður frumsýnd 15. janúar næstkomandi. Munu þættir varpa ljósi á leynilega herferð ísraelskra yfirvalda sem miðast að því að hafa áhrif á breska ráðamenn. 

Á hálfs árs tímabili fór blaðamaður á fundi með fulltrúum þrýstihópa sem njóta mikils stuðnings ísraelskra stjórnvalda. 

Blaðamaðurinn sagðist vera aðgerðasinni sem væri hliðhollur Ísrael og vildi berjast gegn viðskiptaþvingunum.