Í útvarpsþættinum Harmageddon á X-inu í gær sagði hún að slíkt kæmi í veg fyrir að sú ríkisstjórn sem tæki til starfa myndi útvatna þau kosningaloforð flokkanna sem kjósendur veittu umboð sitt.
Píratar mælast vel í skoðanakönnunum og mælast ítrekað stærsti stjórnmálaflokkur landsins til skiptis við Sjálfstæðisflokkinn. Ef að niðurstöður skoðanakannana endurspeglast í niðurstöðum kosninga er líklegt að Píratar standi uppi með pálmann í höndunum við myndun ríkisstjórnar og hugmyndir Birgittu gætu hugsanlega verið hafðar að leiðarljósi.
Í Fréttablaðinu í morgun sagði Grétar Þór Eyþórsson, stjórnmálafræðiprófessor við Háskólann á Akureyri, að slíkar hugmyndir gætu verið Pírötum fjötur um fót í stjórnarmyndunarviðræðum enda hafa leiðtogar Samfylkingarinnar og Vinstri Grænna tekið fálega í hugmyndir um stutt kjörtímabil.
Oddný: Reynsla síðustu ríkisstjórnar víti til varnaðar
Oddný Harðardóttir, formaður Samfylkingarinnar, sagði í hádegisfréttum Bylgjunnar í dag að hægt væri að gera breytingar á stjórnarskrá án þess að hafa stutt kjörtímabil.

„Það eru líka mörg önnur mikilvæg mál sem þarf að klára þannig að við erum ekki hlynnt því að setja okkur tímamörk þegar kemur að afgreiðslu stjórnarskrár.“
Hvað hugmyndina um sáttmála stjórnmálaflokka fyrir kosningar segir Oddný að sú hugmynd hafi ekki verið rædd innan Samfylkingarinnar.
„Við munum ræða það með opnum huga þegar þar að kemur,“ segir hún.
Katrín: Sé ekki rökin fyrir stuttu kjörtímabili
Katrín Jakobsdóttir, formaður Vinstri hreyfingarinnar græns framboðs, segir flokkinn setja vinnu við nýja stjórnarskrá í forgang en hún sjái ekki hversvegna þurfi að stytta kjörtímabilið til þess.

Hvað varðar hugmyndir Birgittu um samstarfssáttmála fyrir kosningar segist Katrín hafa viðrað álíka skoðanir áður.
„Ég hef talað fyrir því að þeir flokkar sem standa fyrir málefnum á sviði félagshyggju og umhverfisverndar. Þeir sem vilja mynda stjórnarsáttmála sem tryggir aukinn jöfnuð og atvinnustefnu í sátt við umhverfið eiga auðvitað að tala skýrt fyrir kosningar um hvað þeir vilja gera og með hverjum þeir vilja gera það,“ segir hún.
Óttarr: Kosið um meira en bara stjórnarskrána
Óttarr Proppé, formaður Bjartrar framtíðar segir flokkinn ekki hafa rætt hugmyndir um stutt kjörtímabil.

Honum hugnast síður hugmyndir um sáttmála fyrir kosningar.
„Kannski aðallega vegna þess að við höfum ekki sterka hefð fyrir því á Íslandi en við auðvitað höfum við vísi að því í því hvernig málin hafa þróast á kjörtímabilinu. Stjórnarandstöðuflokkarnir hafa staðið um margt og unnið vel saman. Það er samt mikilvægt að horfa til þess að það eru margir stjórnmálaflokkar að bjóða fram og hafa mismunandi stefnur fram að færa,“ segir Óttarr.
Benedikt: Gætu eins sameinast heldur en að mynda sáttmála fyrir kosningar
Benedikt Jóhannesson, formaður Viðreisnar sem nú mælist sæmilega í skoðanakönnunum, segir að hugmyndir um stutt kjörtímabil þurfi að ráðast eftir kosningar.

Honum þykir það vera langsótt hugmynd að mynda sáttmála um samstarf með öðrum flokkum fyrir kosningar.
„Ef að menn vilja gera svoleiðis sáttmála fyrir kosningar væri bara einfaldara að flokkarnir sameinuðust um ákveðna stefnu eða bara sameinuðust alveg og það er væntanlega ástæða fyrir því að það eru sex flokkar á þingi en ekki bara tveir, stjórn og stjórnarandstaða.“