Blendin viðbrögð á Facebook við endurkomu Sigmundar Davíðs

Sigmundur Davíð Gunnlaugsson, formaður Framsóknarflokksins, sendi Framsóknarfólki reffilegt bréf fyrr í dag, eins og Vísir greindi samviskusamlega frá, þar sem hann boðaði endurkomu sína eftir dágott hlé af stóra sviðinu í pólitíkinni.

Í bréfinu, þar sem hann boðar nú fulla þátttöku sína í stjórnmálabaráttunni, segir hann að vænta megi viðbragða, jafnvel ofsafenginna, gegn sér. En það sé til „marks um að andstæðingar telja að sér standi ógn að okkur.“

Háðsglósur fremur en húrrahróp

En, frekar eru það nú háðsglósur sem einkenna viðbrögðin ef marka má fólkið á Facebook, en að viðbrögð séu heiftarleg. Vísir skautaði yfir samfélagsmiðilinn mikla og hér má sjá nokkur dæmi.

„Átaksverkefnið „Framsóknarlaust Ísland árið 2016" fær byr undir báða vængi,“ segir Sveinn Andri Sveinsson lögmaður og Baldur Hermannsson, fyrrverandi framhaldsskólakennari sem löngum hefur talist aðdáandi Sigmundar segir:

„Það fer um mig notalegur ylur þegar hann birtist aftur á sviðinu, kominn heim úr sinni Bjarmalandsför, hjartaprúður sem fyrr og hörfar ekki fyrir ofsafengnum viðbrögðum. Undir hans forystu mun Framsókn naga skósólana og nötra í ystu myrkrum, það vill þá enginn, þeir eru rúnir öllu trausti, en hvað gerir það til ... sorphaugar sögunnar eru fullar af pólitískum kviðristum og það munar ekkert um eina í tilbót.“

Píratar ætla ekki að gefa SDG neinn afslátt

Í áðurnefndu bréfinu segir Sigmundur Davíð að engin ástæða sé að kjósa, því enn eigi eftir að uppfylla ýmis kosningaloforð. Ásta Guðrún Helgadóttir, þingmaður Pírata, gefur Sigmundi engan afslátt með slíkan málatilbúnað:

„Við skulum hafa eitt á hreinu - það munu engin mál komast í gegn ef við fáum ekki kjördag um leið og þing kemur aftur saman. Það er alveg kýrskýrt afhverju það þarf að boða til kosninga og það er vegna þess að fólk er komið með nóg af mikilmennskubrjálæði, lögleysi og siðleysi stjórnmálamanna. Þetta er kúltúr sem við erum að reyna að uppræta. Það er ekki lengur hægt að komast upp með allt og halda áfram eins og ekkert sé. Stundum þarf að taka afleiðingum gjörða sinna.“

Hjálp!

Þó þeir séu til sem fagna endurkomu Sigmundar Davíðs verður að segjast að þeir eru í miklum minnihluta. Sigurður G. Tómasson fyrrum fjölmiðlamaður vill gjalda varhug við Sigmundi:

„Ekki er von að siðferðiskennd almennings sé sterk þegar forystumönnum þjóðarinnar sæmir að eiga fé í skattaskjólum og þykir hæfa að skrá sig til heimilis þar sem þeir búa ekki eða eru kvæntir fólki sem skráir sig annars staðar "af skattalegum ástæðum".“

Grímur Atlason framkvæmdastjóri leggur út af lokaorðum Sigmundar, „Ísland allt!“ og segir: „UMFÍ kvaraði sáran undan því á sínum tíma að ég tengdi Framsóknarflokkinn við UMFÍ með því að spyrða "Íslandi allt!" við flokkinn.“

Heiða B. Heiðars auglýsingastjóri segir: „„Íslandi allt“ ‪#‎hjálp.“ Og Bryndís Björgvinsdóttir rithöfundur segir: „Og nú: ekki aðeins í sitthvorum skónum.“

Íslandi flest!

Jóhann Páll Jóhannsson blaðamaður segir: „Velkominn bangsi!“ En, Gunnar Smári Egilsson ritstjóri spyr: „Væri ekki réttara af SDG að segja Íslandi flest! en Íslandi allt!? Svona í ljósi þess að hann á nokkrar rætur á Tortóla.“

Og, Ragnar Þór Pétursson kennari er á svipuðu róli, þar sem hann tjáir sig á Facebook um þessi stórpólitísku tíðindi dagsins:

„Doldið sniðugt hjá Sigmundi Davíð að skrifa „Íslandi allt!“ í endurkomupóstinn. Allt til þess að tryggja að Wintrismálið verði ekki í of skýrum brennidepli þegar allt verður vitlaust um leið og hann kemur til baka og hefur kosningabaráttu (og reynir að koma í veg fyrir kosningar í haust eða í öllu falli að sprengja ríkisstjórn á skipulagðan hátt).“