Sjö söguleg skref strákanna okkar inn á EM

Aðeins þrjár þjóðir voru á undan Íslendingum að tryggja sér farseðilinn á EM og ein þeirra var gestgjafar Frakka. 6. september 2015 verður alltaf risastór dagur í sögu íslenska fótboltans því þá upplifði íslenska þjóðin í fyrsta sinn að eiga lið á stórmóti karla í fótbolta.

Íslenska fótboltalandsliðið komst á sitt fyrsta stórmót í 24. tilraun. Eftir tólf undankeppnir HM og ellefu undankeppnir EM var það í þessari undankeppni Evrópumótsins í Frakklandi þar sem íslensku landsliðsmennirnir komu Íslandi alla leið.

Íslenska liðið vann þrjá fyrstu leiki riðilsins með markatölunni 8-0 og EM-draumurinn var farinn að breytast í veruleika.

Strákarnir svöruðu tapleik í Tékklandi með því að vinna úti í Kasakstan og ná síðan fram hefndum á Tékkum á Laugardalsvellinum.

Eftir stórbrotinn sigur á Hollendingum á Amsterdam Arena var þetta ekki lengur spurning um hvort heldur hvenær og aðeins þremur dögum síðar var EM-farseðillinn í höfn. Markalaust jafntefli við Kas­akstan leit ekki merkilega út á pappírnum en þetta eina stig var risastórt skref í sögu íslenska fótboltans því það kom karlalandsliðinu inn á sitt fyrsta stórmót.

Íslenska liðið missti af fimm stigum í tveimur síðustu leikjunum og náði því ekki að vinna riðilinn en annað sætið á eftir sterku tékknesku liði var ekkert til skammast sín fyrir.

Íslenska fótboltalandsliðið var komið inn á stóra sviðið og framundan var átta mánaða undirbúningur fyrsta stórmóts karlalandsliðsins.

Hér fyrir neðan skoðum við sjö stærstu skrefin sem íslenska liðið tók á leið sinni á Evrópumótið í Frakklandi.

Skref 1  3-0 sigur á Tyrklandi á Laugardalsvellinum 9. september 2014

Jón Daði Böðvarsson kom óvænt inn í byrjunarliðið fyrir Jóhann Berg Guðmundsson sem meiddist í aðdraganda leiksins og Jón Daði var búinn að koma Íslandi í 1-0 eftir aðeins 18 mínútur. Gylfi Þór Sigurðsson og Kolbeinn Sigþórsson bættu við mörkum með mínútu millibili undir lokin.

Hetjan: Jón Daði Böðvarsson

Skref 2  3-0 sigur á Lettland í Riga 10. október 2014

Íslenska liðið var með mikla yfirburði á móti Lettum í Riga en mörkin komu ekki fyrr en á síðustu 25 mínútunum. Aron Einar Gunnarsson lagði upp fyrsta markið fyrir Gylfa Þór Sigurðsson og skoraði síðan annað markið sjálfur. Varamaðurinn Rúrik Gíslason innsiglaði síðan sigurinn í blálokin.

Hetjan: Aron Einar Gunnarsson

Skref 3  2-0 sigur á Hollandi á Laugardalsvellinum 13. október 2014

Íslenska liðið sýndi styrk sinn með 2-0 verðskulduðum sigri á bronsliði Hollendinga frá HM í Brasilíu fyrr um sumarið. Gylfi Þór Sigurðsson skoraði bæði mörkin, það fyrra úr vítaspyrnu sem Birkir Bjarnason fiskaði.

Hetjan: Gylfi Þór Sigurðsson

Skref 4  3-0 sigur á Kasakstan í Astana 28. mars 2015

Eiður Smári Guðjohnsen kom aftur inn í landsliðið eftir átján mánaða fjarveru og hann kom íslenska liðinu í 1-0 á 20. mínútu eftir sendingu Jóhanns Bergs Guðmundssonar. Birkir Bjarnason bætti síðan við tveimur mörkum og Ísland fagnaði sigri eftir lengsta ferða­lag landsliðsins í keppnisleik frá upphafi. Fyrirliðinn Aron Einar Gunnarsson fórnaði fæðingu síns fyrsta barns til að leiða liðið til sigurs.

Hetjan: Eiður Smári Guðjohnsen

Skref 5  2-1 sigur á Tékklandi á Laugardalsvellinum 12. júní 2015

Kolbeinn Sigþórsson kórónaði endurkomu íslenska liðsins og hefnd fyrir tapið í fyrri leiknum með því að skora sigurmarkið á 76. mínútu eftir að hafa unnið boltann af varnarmönnum Tékka og sólað markvörðinn heimsfræga Petr Cech. Aron Einar Gunnarsson jafnaði metin fimm mínútum eftir að Tékkar komust yfir á 55. mínútu. Sigurinn skilaði íslenska liðinu í toppsæti riðilsins.

Hetjan: Kolbeinn Sigþórsson

Skref 6  1-0 sigur á Hollandi í Amsterdam 3. september 2015

Íslenska liðið var komið með annan fótinn á EM eftir besta sigur liðsins frá upphafi. Gylfi Þór Sigurðsson skoraði sigur­markið úr vítaspyrnu á 51. mínútu sem dæmd var eftir að brotið var á Birki Bjarnasyni. Hannes Þór Halldórsson varði allt sem á markið kom og sá til þess öðrum fremur að Ísland varð fyrsta þjóðin til að vinna Holland bæði á heima- og útivelli í undankeppni.

Hetjan: Hannes Þór Halldórsson

Skref 7  0-0 jafntefli við Kasakstan á Laugardalsvellinum 6. september 2015

Íslensku strákarnir náðu ekki að landa sigri á Kasökum á Laugardalsvellinum en liðið hélt hreinu í sjötta sinn í átta leikjum og stigið dugði því til að tryggja farseðilinn á EM. Troðfullur Laugardalsvöllurinn fagnaði EM-sætinu vel og lengi eftir leik með ánægðum leikmönnum íslenska liðsins. Ísland var komið á EM þrátt fyrir að enn væru eftir tvær umferðir í riðlinum.

Hetjurnar: Strákarnir okkar



Þessi grein birtist í EM-blaði Fréttablaðsins sem má finna allt hér.