Njarðvíkurkonur upp í Dominos-deildina í miðjum júní

Njarðvík verður með tvö lið í Domino´s deildinni í körfubolta næsta vetur því KKÍ hefur tekið kvennalið félagsins upp í efstu deild.

Það eru ekki mörg körfuboltalið sem hafa unnið sér sæti í efstu deild í júní en svo varð raunin fyrir stelpurnar úr Ljónagryfjunni.

Hamar skráði ekki lið sitt til leiks næsta vetur og því var eitt laust sæti í deildinni.  Hamarsliðið var búið að missa marga lykilmenn undanfarin ár og sú þróun hélt áfram í vor.

KR tapaði í lokaúrslitum 1. deildar kvenna síðasta vetur og hefði átt að vera næsta lið inn.

Á heimasíðu KKÍ kemur fram að mótanefnd KKÍ hafi leitað til Njarðvíkur og að félagið hafi þegið sætið. Domino´s deild kvenna verður því skipuð átta liðum næsta vetur eins og reglugerð segir til um.

Njarðvíkurkonur urðu í 3. sæti í 1. deildinni síðasta vetur eftir 12 sigra í 20 leikjum. Liðið vann hinsvegar 8 af 9 leikjum sínum með Carmen Tyson-Thomas innanborðs en sá öflugi leikmaður skoraði 36,1 stig og tók 17,8 fráköst að meðaltali í leik.

Njarðvík varð tvöfaldur meistari 2012 en féll úr Dominos-deildinni tveimur árum síðar. Liðið hefur verið í 1. deild undanfarin tvö tímabil.

Liðin í Domnio´s deild kvenna 2016-17 verða því: Snæfell, Haukar, Keflavík, Valur, Grindavík, Stjarnan, Skallagrímur og Njarðvík.