Getur spilað með meisturunum ef hann gefur frá sér hálfan milljarð

Leikstjórnandinn Colin Kaepernick stendur frammi fyrir ákvörðun sem sumir myndu segja að væri erfið en aðrir ekki.

NFL-meistarar Denver Broncos hafa nefnilega áhuga á að fá hann en aðeins ef hann er til í að taka á sig ansi væna launalækkun.

Í gær festist samningur Kaepernick við San Francisco 49ers og hann er öruggur um að fá rúmlega 1,4 milljarð í laun frá félaginu. Félagið getur ekki sagt þeim samningi upp.

Denver er aftur á móti „aðeins“ til í að greiða honum 860 milljónir króna. Að spila með Denver er þó líkast til meira spennandi enda með betri útherja og sóknarlínu.

Þó svo það hafi verið mikil óvissa með framtíð Kaepernick síðustu vikur þá segist þjálfari 49ers, Chip Kelly, vera mjög hrifinn af honum og vill endilega vinna með honum.