Stelpurnar fara af stað í kvöld

 Úrslitakeppni Domino’s deildar kvenna hefst í kvöld með tveimur leikjum, annar er á heimavelli deildarmeistara Hauka (á móti Grindavík) en hinn á heimavelli bikarmeistara Snæfells (á móti Val). Báðir leikir hefjast kl. 19.15.

Flestir búast við því að Haukar og Snæfell mætist í lokaúrslitunum en fyrst þurfa liðin þó að vinna þrjá leiki á móti Grindavík og Val.

Grindavíkurkonur hafa þegar slegið deildarmeistara Hauka út úr einni keppni í vetur (8 liða úrslit bikarsins) og tryggðu sér sæti í úrslitakeppninni með sannfærandi útisigri á Keflavík.

Haukarnir hafa ekki tapað leik síðan þeir skiptu út einum þjálfara sínum og létu hina bandarísku Chelsea Schweers fara. Haukaliðið kemur inn í úrslitakeppnina á tíu leikja sigurgöngu.

Valskonur hafa verið í mikilli sókn eftir áramót en þær hafa hins vegar tapað ellefu leikjum í röð á móti Snæfelli á Íslandsmóti eða í bikar, nú síðast í lokaumferð deildarkeppninnar fyrir rúmri viku.

Snæfellsliðið hefur ekki spilað eins vel eftir að bikarinn kom í hús og missti deildarmeistaratitilinn til Hauka en í kvöld byrjar ný keppni.