Reiðarslag fyrir lítið samfélag

Karlmaður frá Sri Lanka sem grunaður er um að hafa haldið tveimur konum frá sama landi í vinnuþrælkun í Vík í Mýrdal var í dag úrskurðaður í þrjátíu daga gæsluvarðhald. Sveitarstjórnarmaður í Vík segir málið reiðarslag fyrir lítið samfélag en bæjarbúar vissu ekki af tilvist kvennanna.

Maðurinn var handtekinn í umfangsmiklum aðgerðum lögreglu í gær. Auk lögreglunnar á Suðurlandi komu sérsveit ríkislögreglustjóra, lögreglan á Suðurnesjum og mansalsteymi lögreglunnar á höfuðborgarsvæðinu að aðgerðinni. Þá fékk lögreglan aðstoð frá skattrannsóknarstjóra og Vinnumálastofnun vegna málsins. Síðdegis í dag var maðurinn úrskurðaður í gæsluvarðhald til 18. mars.

„Ástæðan fyrir þessum viðbúnaði var að við þurftum að fara á þrjá staði samtímis í húsleit. Aðgerðin gekk mjög vel enda vel skipulögð. Eins og ég segi leituðum við til manna sem að þekkja til og nú er framundan að vinna úr þeim gögnum sem við erum með og rannsóknin mun halda áfram. Hún er á mjög viðkvæmu stigi,“segir Þorgrímur Óli Sigurðsson hjá lögreglunni á Suðurlandi.

Konurnar sem að frelsaðar voru, hafa þær fengið viðeigandi  hjálp?

„Við vissulega munum veita þeim þá aðstoð sem þær þurfa. Þær munu fá réttargæslumann. Að öðru leiti get ég ekki tjáð mig um það,“ segir Þorgrímur.

Bæjarbúar í miklu áfalli

Bæjarbúar í Vík eru í miklu áfalli vegna málsins en enginn nágranna fólksins sem fréttastofa ræddi við kannaðist við að hafa séð konurnar. 

„Við getum sagt að þetta sé algjört reiðarslag fyrir okkur. Við erum harmi slegin yfir að svona lagað geti þrifist hérna. Þetta kom bara eins og þruma úr heiðskíru lofti, þetta virtist hafa verið svo vel falið. Svo þetta kom okkur verulega á óvart. Það vissi enginn af tilvist þeirra,“ segir Tryggvi Ástþórsson sveitarstjórnarmaður í Vík og varaformaður Verkalýðsfélags Suðurlands. 

Stýrði saumafyrirtækinu Vonta International

Maðurinn stýrði saumafyrirtækinu Vonta International sem hefur verið undirverktaki Icewear og starfað í húsakynnum þeirra.

Icewear, sem keypti Víkurprjón árið 2012, sendi frá sér yfirlýsingu til fjölmiðla í dag um að fyrirtækið hefði rift samningnum við Vonta International en vildu ekki tjá sig um málið að öðru leiti. Þá var fréttastofu neitað um að taka myndir af verksmiðju Icewear í Vík þrátt fyrir að boðið væri upp á ókeypis skoðunarferðir um hana fyrir ferðamenn. 

Samkvæmt heimildum fréttastofu unnu konurnar við að ganga frá flíkum sem saumaðar voru af starfsfólki Vonta í húsakynnum Icewear.

Lögregla hafði áður haft afskipti af Vonta International

Lögreglan hafði áður haft afskipti af starfsemi Vonta International. Skömmu fyrir áramót fór lögreglan að beiðni Verkalýðsfélags Suðurlands á saumastofuna vegna ábendinga um að maðurinn væri með fólk í vinnu sem hefði ekki tilskilin leyfi.

Már Guðnason, formaður verkalýðshreyfingar Suðurlands, segir málið litið grafalvarlegum augum.

„Þetta er í annað skipti sem þetta kemur upp þarna hjá þessum aðilum þannig við munum fylgja þessu máli eftir af fullum þunga eins og okkur er unt,“ segir Már.