Hollenska konan fékk átta ára dóm í Hæstarétti

Mirjam Foekje van Twuijver frá Hollandi var dæmd í átta ára fangelsi í Hæstarétti í dag. Hún var sakfelld fyrir fíkniefnasmygl en allt bendir til þess að hún hafi verið burðardýr í málinu. 

Héraðsdómur hafði áður sakfellt hana og dæmt í 11 ára fangelsi en hámarksrefsing í málaflokknum er tólf ár. Um var að ræða þyngsta dóm sem fallið hefur í fíkniefnamáli hér á landi.

Atli Freyr Fjölnisson, sem veitti meintum fíkniefnum viðtöku við Hótel Frón nokkrum dögum eftir komu Mirjam til landsins, var dæmdur í fjögurra ára fangelsi. Hafði hann áður hlotið fimm ára dóm í héraði. Hlutverk Atla var að taka við fíkniefnunum og koma þeim í hendur annars óþekkts aðila.

Hvorki Mirjam né Atli Freyr virðast hafa vitað hverjir stóðu að innflutningnum en þau fengu hvort um sig sérstaka farsíma í hendur til að hafa samskipti við ónefnda aðila hér á landi.

Til frádráttar fangelsisdómunum kemur gæsluvarðhald beggja en Mirjam hefur verið í varðhaldi undanfarna tíu mánuði eða frá komu hennar til landsins 4. apríl. Atli Freyr varð í gæsluvarðhaldi í tvær vikur eftir að hann var handtekinn í fyrrnefndri tálbeituaðgerð.

85 þúsund e-töflur 

Mirjam og sautján ára dóttir hennar fluttu inn tuttugu kíló af fíkniefnum frá Hollandi í apríl í fyrra. Í tösku Mirjam fundust rúm níu kíló af amfetamíni en í tösku dóttur hennar voru tíu kíló af MDMA-mulningi. Úr mulningnum er talið að framleiða hafi mátt um 85 þúsund e-töflur.

Dóttir hennar var ekki saksótt þar sem sannað þótti að hún hafi hvorki vitað af því að efni væru í hennar tösku, né út á hvað ferðin gekk. Þegar Mirjam var sagt að það hefðu verið fíkniefni í tösku dóttur hennar líka varð hún samvinnuþýð við lögregluna.

Mirjam tók meðal annars þátt í tálbeituaðgerð á Hótel Fróni í Reykjavík. Vísir hefur fjallað með ítarlegum hætti um þessa aðgerð en ekki verður annað sagt en að hún hafi mistekist. 

Lögreglan ber fyrir sig að samskiptavandamál hafi orðið til þess að karlmaður var handtekinn á staðnum í stað þess að honum væri fylgt eftir til að hafa mögulega hendur í hári skipuleggjenda smyglsins. Fyrir liggur að lögreglufulltrúi sem kom að stjórnun aðgerða á vettvangi sætir rannsókn héraðssaksóknara vegna ásakanna um spillingu í starfi frá kollegum.

Samkvæmt heimildum Vísis telja sumir kollegar lögreglufulltrúans að aðkoma hans að málinu hafi orðið til þess að það fór út um þúfur. Fulltrúanum hefur verið vikið úr starfi á meðan mál hans er til rannsóknar.

Vildu frestun en nýr verjandi féll frá kröfunni

Verjendur Mirjam og Atla Freys fyrir Hæstarétti, Björgvin Jónsson og Vilhjálmur H. Vilhjálmsson, höfðu farið fram á að málinu yrði frestað á meðan ásakanir á hendur fyrrnefndum lögreglufulltrúa væru til rannsóknar. Skömmu fyrir málflutning í Hæstarétti fengu verjendur í hendurnar skýrslu umrædds lögreglufulltrúa sem einhverra hluta vegna hafði ekki þótt tilefni til að setja í gögn málsins.

Fram til þess tíma hafði ekkert tengt lögreglufulltrúann við aðgerðina og var hann til að mynda ekki fenginn til þess að bera vitni í héraði heldur var undirmaður hans sendur á vettvang í hans stað.

Skömmu fyrir málflutning í Hæstarétti skipti Atli Freyr um verjenda í málinu og Bjarni Hauksson kom inn í stað Vilhjálms. Fór svo að verjendurnir, Björgvin og Bjarni, héldu ekki til streitu kröfunni um að málinu yrði frestað.

Velta má fyrir sér hvort niðurstaða í dómssal hefði verið önnur ef tálbeituaðgerð lögreglunnar, þar sem Mirjam gegndi lykilhlutverki og lagði sig í hættu, hefði ekki farið jafn ótrúlega út um þúfur og raunin varð. Skrifast klúðrið alfarið á lögreglu en aldrei hefur þótt ástæða til að fá óháða úttekt á því hvers vegna fór sem fór.

Efni upp á hundruð milljóna króna

Mirjam játaði innflutninginn fyrir dómi, það er að hafa vitað af fíkniefnum í eigin tösku, en sagði aðila í Hollandi hafa svikið sig með því að setja fíkniefni einnig í tösku dóttur hennar. Í töskunni sem dóttir hennar bar voru tíu kíló af MDMA.

Athygli vakti að svo til engin tilraun var gerð til að fela fíkniefnin í töskum þeirra mæðgna. Töskurnar voru stútfullar af fíkniefnum en götuvirði efnanna hér á landi nemur hundruðum milljóna króna.

Að neðan má sjá tímalínu um málið.