Körfuboltakvöld: Systurnar úr Hólminum | Myndband

Snæfell tyllti sér á topp Domino's deildar kvenna með 14 stiga sigri, 84-70, á Haukum í toppslagnum í Stykkishólmi á þriðjudaginn.

Systurnar Gunnhildur og Berglind Gunnarsdætur létu að venju mikið að sér kveða í liði Snæfells en strákarnir í Domino's Körfuboltakvöldi ræddu um systurnar úr Stykkishólmi í þætti gærkvöldsins.

„Ég varð þess heiðurs aðnjótandi að fá að þjálfa Berglindi í yngri landsliðunum. Þetta eru þvílíkir snillingar,“ sagði Jón Halldór Eðvaldsson.

„Ég þekki Gunnhildi minna en Berglind er einn heilsteyptasti einstaklingurinn sem ég hef kynnst í körfuboltanum.“

Sjá einnig: Körfuboltakvöld: Stóra Helenu-málið | Myndband

Gunnhildur er í lykilhlutverki í íslenska landsliðinu en Berglind er einnig farin að banka á dyrnar þar og lék sína fyrstu landsleiki í fyrra.

„Það tala allir í landsliðinu um hversu mikilvæg hún er. Hún er svo mikill karakter,“ sagði Jón Halldór um Gunnhildi.

„Þetta er engin kókópöffs kynslóð. Þetta er fólk utan af landi, þetta er ekki Garðabær,“ skaut Fannar Ólafsson inn í.

Umræðuna í heild sinni má sjá hér að ofan.