Tómas Holton kominn aftur í Val | Aðstoðar Ara

Tómas Holton er kominn inn í þjálfarateymi kvennaliðs Vals í Domino´s deild kvenna í körfubolta og mun verða þjálfaranum Ara Gunnarssyni til aðstoðar út tímabilið.

Samstarf þeirra byrjaði vel því Valur vann 22 stiga sigur í Keflavík í fyrsta leik Tómasar við hlið Ara.

Tómas Holton og Ari Gunnarsson þekkjast vel frá því að þeir spiluðu saman á sínum tíma, bæði hjá Val og Skallagrími.

Tómas Holton þekkir líka vel til eins leikmanns Valsliðsins en dóttir hans, Bergþóra Holton Tómasdóttir, spilar með liðinu og var með 14 stig og 6 stoðsendingar í sigrinum á Keflavík.

Tómas Holton er fjórði leikjahæsti leikmaður Vals í úrvalsdeild karla frá upphafi og var í síðasta Íslandsmeistaraliði félagsins árið 1983.

Tómas var síðast í herbúðum Vals veturinn 1991 til 1992 en þá var hann spilandi þjálfari liðsins og fór með Valsliðið alla leið í lokaúrslitin um Íslandsmeistaratitilinn.

Næsti leikur Valsliðsins er á móti Grindavík í dag en leikurinn hefst klukkan 16.30 í Valshöllinni að Hlíðarenda. Leikurinn verður sýndir beint á Stöð 2 Sport og hér inn á Vísi.