Körfuboltakvöld: „Má ekkert segja?"

Dómararnir í leik Snæfells og Hauka á fimmtudaginn voru mikið til umræðu, en fjöldi tæknivilla voru dæmdar sem menn voru missáttir við.

Körfuboltakvöld var á dagskrá í gær þar sem Kjartan Atli Kjartansson, Hermann Hauksson og Kristinn Friðriksson ræddu málin.

„Ég átta mig ekki á þessu. Kári (Jónsson, leikmaður Hauka) snýr baki í hann og er að labba í burtu þá aðvarar hann Kára. Má ekkert segja? Þarf maður bara að halda kjafti og vera alltaf kurteisi náunginn," sagði Hermann Hauksson.

„Ég veit ekkert hvað var að gerast hérna. Þetta voru bara stórundarlegur tæknivillur á teipi - að minnsta kosti tvær af þessum ef ekki þrjár," bætti Kristinn Friðriksson við.

Spekingarnir í Körfuboltakvöldi og þáttarstjórnandinn Kjartan Atli Kjartansson kölluðu eftir því að dómararnir myndu aðeins slaka á í tæknivillunum.