Kári mætir í uppáhalds íþróttahúsið sitt í kvöld

Kári Jónsson og félagar í Haukum heimsækja ÍR í sjöttu umferð Domino´s deildar karla í kvöld en leikurinn verður í beinni útsendingu á Stöð 2 Sport.

Kári, sem er aðeins 18 ára gamall, er á sínu þriðja tímabili í úrvalsdeildinni og tveir bestu leikir hans hafa einmitt verið á móti ÍR í Seljaskólanum.

Kári skoraði 26 stig á rúmum 18 mínútum í sigri á ÍR í Seljaskólanum 24. október 2013 en hann var þá aðeins að spila sinn þriðja úrvalsdeildarleik á ferlinum.

Kári hitti úr öllum sex þriggja stiga skotum sínum í leiknum og alls fóru 10 af 11 skotum hans rétta leið. Haukar unnu með 21 stigi þann tíma sem hann var inná vellinum.

Rúmu ári síðar var Kári aftur í stuði í sigurleik Hauka í Seljaskólanum. Kári skoraði þá 25 stig í eins stigs sigri. Kári hitti úr 4 af 7 þriggja stiga skotum sínum í leiknum og alls úr 9 af 14 skotum sínum utan af velli.

Þessir tveir leikir Kára í Seljaskólanum eru enn tveir stigahæstu leikir Kára í úrvalsdeildinni en það er líka athyglisvert að fimm stigahæstu leikir Kára í Domino´s deildinni hafa allir verið á útivelli.

Kári hefur skorað 25,5 stig að meðaltali í tveimur leikjum sínum í Seljaskóla og sett niður 10 af 13 þriggja stiga skotum sínum í þessum tveimur leikjum sem er mögnuð skotnýting.

Það er líka hægt að velta því fyrir sér hvort að það tengist því eitthvað að faðir hans, Jón Arnar Ingvarsson, þjálfaði ÍR-liðið á fimm tímabilum en Kári var níu ára þegar faðir hans tók fyrst við þjálfun ÍR-liðsins.

Nú er að sjá hvort Kári detti enn á ný í stuð í Seljaskólanum í kvöld þegar Haukar mæta ÍR-ingum í beinni á Stöð 2 Sport.

Flest stig Kára Jónssonar í einum leik í úrvalsdeild karla:

26 - á móti ÍR í Seljaskóla 24. október 2013

25 - á móti ÍR í Seljaskóla 4. desember 2014

23 - á móti Tindastól á Sauðárkróki 8. mars 2015

20 - á móti Snæfelli í Stykkishólmi 30. október 2014

19 - á móti Skallagrími í Borgarnesi 29. janúar 2015

18 - á móti Njarðvík í Njarðvík 26. febrúar 2015

18 - á móti Keflavík á Ásvöllum 12. mars 2015

18 - á móti KR á Ásvöllum 23. október 2015